कृषी हवामान : आज कार्तिकी एकादशीच्या दिवशी अवकाळीचं संकट! या १६ जिल्ह्यांत मुसळधार बरसणार

आज (२ नोव्हेंबर) रत्नागिरी, सिंधुदुर्ग, नंदूरबार, धुळे, जळगाव, नाशिक, अहमदनगर, पुणे, सातारा, कोल्हापूर, तसेच छत्रपती संभाजीनगर, जालना, बीड, परभणी, लातूर आणि नांदेड या जिल्ह्यांत विजांसह हलक्या पावसाचा अंदाज हवामान विभागाने वर्तवला आहे. राज्यातील उर्वरित भागात तापमानात चढ-उतार होण्याची शक्यता आहे.

‘मोंथा ’ चक्रीवादळाचे अवशेष असलेले ठळक कमी दाब क्षेत्र सध्या पश्चिम बंगाल आणि त्याच्या आसपासच्या भागात सक्रिय आहे. अरबी समुद्रातील कमी दाब प्रणालीची तीव्रता कमी होत असली, तरी गुजरात आणि महाराष्ट्राच्या किनाऱ्यालगत आणखी एक ठळक कमी दाब क्षेत्र तयार होत आहे. त्याचबरोबर, थायलंडच्या आखातात दक्षिण म्यानमारच्या किनाऱ्यावर चक्राकार वारे वाहत असून, या भागात आज (ता. २) नव्या कमी दाब क्षेत्राची निर्मिती होण्याचे संकेत आहेत.

माती परीक्षण करून आवश्यक पोषक घटकांची पातळी तपासावी. त्यानुसार खत व्यवस्थापन ठरवावे. जमिनीची नांगरणी खोलवर करून ओलावा टिकवून ठेवावा. गहू, हरभरा, ज्वारी, आणि कांदा या रब्बी पिकांसाठी योग्य बियाण्यांची निवड करावी. तसेच पावसाची शक्यता असताना बियाणे पेरणी काही दिवस पुढे ढकलणे फायदेशीर ठरेल.