TRENDING:
बलात्काराचा गुन्हा दाखल केल्याचा राग मनात धरून आरोपीनं हे कृत्य केलं आहे. आरोपीनं कोयता, भाला आणि कुऱ्हाडीच्या सहाय्याने पीडितेच्या शिक्षक वडिलांवर हल्ला केला. या हल्ल्यात पीडितेचे वडील बेशुद्ध झाल्यानंतर आरोपीनं कुऱ्हाड, भाला आणि कोयता घटनास्थळी टाकून पळ काढला. या प्रकरणी शिक्षकाच्या पत्नीने केज पोलीस ठाण्यात गुन्हा दाखल केला आहे.
सूरज गुंड असं गुन्हा दाखल झालेल्या नराधम आरोपीचं नाव आहे. त्याने काही दिवसांपूर्वी एका जखमी शिक्षकाच्या मुलीवर अत्याचार केला होता. या प्रकरणी सूरजवर गुन्हा दाखल केला होता. या प्रकरणात त्याला अटकही झाली होती. पण जामीनावर सुटल्यानंतर सूरजने पीडितेच्या आई वडिलांविरोधात सूड उगवला आहे. घटनेच्या दिवशी मंगळवारी आरोपीनं पीडित मुलीच्या शिक्षक वडिलांच्या कारवर ट्रॅक्टर चढवला.
advertisement
तसेच कोयता, भाला आणि कुऱ्हाडीने हल्ला केला. ही घटना केज तालुक्यातील वरपगाव रस्त्यावर मंगळवारी सकाळी ११ वाजता घडली. हल्ल्यानंतर संशयित सूरज गुंड याने त्याच्या सोशल मीडिया अकाउंटवरून शिक्षकाच्या मुलीचे फोटो व्हायरल केले. एवढ्यावरच तो थांबला नाही, तर शिक्षक दाम्पत्याच्या फोटोवर भावपूर्ण श्रद्धांजली असं लिहिलं. याबाबत शिक्षकाच्या पत्नीने केज पोलिसांत तक्रार दिली आहे.
नराधमाने हल्ला केल्यानंतर जेव्हा शिक्षकाच्या कारचा चालक आणि इतर सहकाऱ्यांनी सूरज गुंडला रोखण्याचा प्रयत्न केला. पण त्याने कमरेला लावलेले गावठी पिस्तूल काढून त्यांना जिवे मारण्याची धमकी दिली. इथून पळून जा, नाहीतर तुम्हालाही सोडणार नाही, अशी धमकी त्याने दिली. या हल्ल्यात शिक्षक बेशुद्ध झाल्यानंतर आरोपीने घटनास्थळी कुऱ्हाड, भाला, कोयते कारजवळ टाकून पळ काढला. या घटनेचा पुढील तपास पोलीस करत आहेत.