आज दुपारच्या सुमारास ट्रान्स हार्बरवरील खारकोपर उरणदरम्यानची लोकलसेवा बंद झाली आहे. अप आणि डाऊन दोन्ही मार्गावरची लोकलसेवा बंद झाली आहे. पेट्रोलची पाईपलाईन फुटल्यामुळे ही लोकलसेवा बंद झाल्याची माहिती मिळाली आहे. सुदैवाने यामध्ये कोणतीही जीवीतहानी झालेली नाही. कोणताही अपरिचीत घटना घडण्यापूर्वीच मध्य रेल्वेने खबरदारी म्हणून रेल्वे सेवा बंद केली आहे. शिवाय, मध्य रेल्वेने प्रवाशांना सहकार्य करण्याचं आवाहन केलं आहे.
advertisement
किती वेळामध्ये पाईपलाईन दुरूस्तीसाठी वेळ लागेल, याची माहिती कळू शकलेली नाही. रेल्वे पोलिस कर्मचाऱ्यांकडून युद्ध पातळीवर त्या पाईपलाईनच्या दुरूस्तीचं काम सध्या सुरू आहे. खारकोपर- उरण मार्गावर पेट्रोलची पाईपलाईन फुटल्यामुळे प्रवाशांची चांगलीच तारांबळ उडाली आहे. आणखी किती वेळात ही रेल्वे सेवा पुर्ववत होणार ? हे पाहणे महत्त्वाचं ठरणार आहे.
दरम्यान, मध्य रेल्वेच्या मुख्य, हार्बर आणि ट्रान्स हार्बरच्या तुलनेत सीवूड बेलापूर- उरण मार्गावर लोकल फेऱ्या अत्यंत कमी आहेत. उरण मार्गावर प्रवासी संख्या वाढत असतानाही, लोकल फेऱ्या वाढवण्यात आलेल्या नाहीत. उरण मार्गावर दीड तासाच्या अंतराने लोकल उपलब्ध आहे. यामुळे लोकल फेऱ्या वाढवण्याची मागणी प्रवाशांकडून करण्यात आली होती.
लवकरच रेल्वेच्या लोकल फेऱ्यांमध्ये वाढ होणार असल्याचं बोललं जात आहे.