'मी ऑपरेशन मौतजवळ आलोय', GFला VIDEO कॉल करत तरुणाने लॉजमध्ये संपवलं

सौरभ शर्मा गेल्या पाच-सहा दिवसांपासून अमळनेर बसस्थानकाजवळील पाठक प्लाझामधील एका लॉजमध्ये 'करणसिंग एम. पी.' या बनावट नावाने राहात होता. तो दररोज सकाळी अकराच्या सुमारास उठवायला सांगायचा. मात्र १२ तारखेला त्याने लॉज व्यवस्थापकाला सांगितले होते की, "माझी झोप डिस्टर्ब करू नका, मला उशिरा उठवा." १३ मे रोजी दुपारी लॉज कर्मचारी त्याला उठवण्यासाठी गेले असता आतून कुठलाही प्रतिसाद मिळाला नाही. सायंकाळी पुन्हा प्रयत्न केल्यानंतरही प्रतिसाद न मिळाल्याने पोलिसांना पाचारण करण्यात आले. पोलिसांनी दरवाजा तोडून आत डोकावले असता, सौरभने बेडशीट फाडून छताच्या कडीला गळफास घेतलेला दिसून आला.

तत्काळ त्याला खाली उतरवण्यात आले. तपासात त्याची खरी ओळख उघड झाली. अहमदाबादचा रहिवासी असलेला सौरभ शर्मा पोस्को कायद्यानुसार आरोपी असल्याचे कळते. मृत्यूपूर्वी त्याने आपल्या प्रेयसीशी व्हिडिओ कॉल करून “मी ऑपरेशन ‘मौत’ जवळ पोहचलोय...” असे सांगत भावनिक निरोप दिला अशी देखील माहिती पोलिसांच्या प्राथमिक तपासात समोर आली आहे. त्याच्या रुममध्ये आढळलेल्या डायरीत काही व्यक्तींच्या नावांचा उल्लेख असून, त्याने त्याला फसवणाऱ्या मुलीच्या आणि तिच्या कुटुंबीयांविषयी भावना व्यक्त केल्याची माहिती समोर आली आहे.

अमळनेर पोलीस ठाण्यात याप्रकरणी अकस्मात मृत्यूची नोंद करण्यात आली असून, घटनास्थळावरून जप्त करण्यात आलेला मोबाईल, डायरी आणि इतर साहित्य फॉरेन्सिक तपासासाठी पाठवण्यात आले आहे. पोलीस पुढील तपास करत आहेत. दरम्यान हातरून गुजरातमधून अमळनेर येथे का आला?, व त्याने अमळनेर येथेच का आत्महत्या केली?, हे अद्याप स्पष्ट होऊ शकलेले नाही. पोलीस या घटनेचा सविस्तर तपास करत आहेत.