उन्हाळी भुईमूग आणि तीळ पिकांचे बियाणे 13 जिल्ह्यांत मोफत मिळणार, इथं करा नोंदणी?

कृषी विभागाने दिलेल्या माहितीनुसार, या योजनेत भुईमूग पिकासाठी हेक्टरी 150 किलो शेंगा (114 रुपये प्रति किलो) इतकी तर तिळासाठी हेक्टरी 2.5 किलो प्रमाणित बियाणे (197 रुपये प्रति किलो) 100 टक्के अनुदानावर देण्यात येणार आहेत. सुधारित वाणांचा प्रसार आणि पिकाची उत्पादकता वाढवणे हा यामागचा मुख्य उद्देश आहे. भुईमूग बियाणांचा लाभ नाशिक, धुळे, अहमदनगर, पुणे, सातारा, सांगली, कोल्हापूर, संभाजीनगर व अकोला या नऊ जिल्ह्यांना मिळणार आहे.

तर तिळाच्या बियाण्यांचा लाभ जळगाव, बीड, लातूर आणि बुलढाणा या चार जिल्ह्यांतील शेतकऱ्यांना मिळेल. प्रति लाभार्थी किमान 0.20 हेक्टर आणि कमाल 1 हेक्टर क्षेत्रासाठीच हा लाभ लागू राहणार आहे. शासकीय बियाणे पुरवठादार संस्थांकडून भुईमूग बियाणे 20 किंवा 30 किलोच्या पॅकमध्ये तर तिळाचे बियाणे 500 ग्रॅम किंवा 1 किलोच्या पॅकमध्ये उपलब्ध आहेत. पॅकिंग साईजनुसार बियाणे देण्यात येणार असल्याने शेतकऱ्यांना आवश्यकतेपेक्षा अधिक बियाणे लागल्यास जादा रक्कम स्वतः भरावी लागणार आहे.

योजनेसाठी शेतकऱ्यांची ॲग्रिस्टॅक नोंदणी बंधनकारक असून अर्जाची निवड प्रथम अर्ज करणाऱ्यास प्रथम प्राधान्य या तत्त्वावरच केली जाणार आहे. इच्छुक शेतकऱ्यांनी लवकरात लवकर ऑनलाइन अर्ज करावा, असा सल्ला कृषी विभागाने दिला आहे. अधिक माहितीसाठी शेतकऱ्यांनी आपल्या जवळच्या कृषी कार्यालयाशी संपर्क साधण्याचे आवाहनही करण्यात आले आहे. या उपक्रमामुळे उन्हाळी हंगामात तेलबियांच्या उत्पादनात वाढ होऊन राज्यातील खाद्यतेलाच्या गरजांची पूर्तता करण्यास मोठी मदत होणार आहे.