दिल्लीतील स्फोटानंतर मुंबईत हालचाली, मुंब्य्रानंतर कुर्ल्यात महाराष्ट्र ATSची छापेमारी, चौकशीत काय सापडलं?

दिल्लीतील स्फोटानंतर महाराष्ट्र एटीएसने मंगळवारी मुंब्य्रात छापेमारी केली होती. या कारवाईत मुंब्रा येथून ताब्यात घेण्यात आलेल्या इब्राहिम आबादीचं कुर्ला कनेक्शन समोर आलं होतं. त्यानंतर आज कुर्ल्यातही छापेमारी करण्यात आली होती. कुर्ल्यातील एम के हाईट या आबादीच्या घरी एटीएसकडून ही कारवाई करण्यात आली आहे. या दरम्यान इब्राहिम आबादीची पहिली पत्नी आणि तीन मुले कुर्ला परिसरात राहत असल्याची माहिती मिळाली. आबादीने दुसरे लग्न केल्यानंतर कुर्ला परिसर सोडला होता,अशी माहिती समोर आली आहे.

त्यानंतर आज महाराष्ट्र एटीएसने मुंब्रा येथील कौसा विभागामध्ये राहणाऱ्या एका शिक्षकाच्या घरी धाड टाकली होती. या धाडी दरम्यान घरातले मोबाईल कम्प्युटर आणि इतर सामग्री हस्तगत करण्यात आले होते. यासोबत मुंबईतील कुर्ल्यामधील त्याच्या दुसरा घरी महाराष्ट्र एटीएसने छापा टाकून पुढील तपास सूरू केला आहे.

सदरचा शिक्षक हा जमात ये इस्लाम या संघटनेशी संबंध असल्याचे समोर आले आहे. शिक्षकाचे नाव समजू शकलेले नाही. पण या कारवाईत आतापर्यंत तरी घरातले मोबाईल कम्प्युटर आणि इतर सामग्री हस्तगत करण्यात आले होते.आता एटीएसच्या हाती काय काय माहिती लागते? हे पाहणे महत्वाचे ठरणार आहे.

अल-कायदा या दहशतवादी संघटनेचे साहित्य बाळगल्याच्या आरोपावरून एका सॉफ्टवेअर इंजिनिअरला पुण्यातून अटक करण्यात आली होती. याच प्रकरणी आता महाराष्ट्र एटीएसने मुंब्रा भागात छापेमारी केली आहे.

'अल कायदा इन इंडियन सबकाँटिनेन्ट' या दहशतवादी संघटनेच्या समर्थनार्थ जिहादचा प्रसार-प्रचार करून देशाच्या एकता आणि सुरक्षिततेला धोका निर्माण केल्याच्या आरोपावरून जुबेर इलियास हंगरगेकर याला अटक करण्यात आली होती.