नगरपरिषद निवडणुकीला राड्याचं ग्रहण, कुठे हाणामारी तर कुठे दगडफेक; वाचा कुठे कुठे लागलं गालबोट?

महायुतीचे मित्रपक्ष असलेल्या शिवसेना आणि राष्ट्रवादीच्या कार्यकर्त्यांमध्ये राडा झाला आहे.शिवसेनेचे विकास गोगावले आणि आणि राष्ट्रवादीचे सुशांत जाबरे यांचे समर्थक भिडले. सुशांत जाबरेंच्या समर्थकांनी विकास गोगावलेंवर रिव्हॉल्व्हर रोखल्याचा आरोप केला जात आहे. यावेळी सुशांत जाबरे यांच्या समर्थकांच्या अनेक वाहनांची तोडफोड करण्यात आली. पोलिसांनी वेळीच हस्तक्षेप करत परिस्थिती आटोक्यात आणली.या राड्यावरून दोन्ही पक्षांकडून आरोप-प्रत्यारोपांच्या फैरी झाडत आहेत.

बीडच्या गेवराई येथे नगरपालिका निवडणूक मतदान प्रक्रियेदरम्यान दोन गटांमध्ये मोठा राडा झाला. गेवराई शहरातील मोंढा भागात असलेल्या मतदान केंद्राबाहेर पवार आणि पंडित गट समोरासमोर आले. यावेळी मारहाणीची घटनाही घडली. त्यानंतर गेवराईचे माजी आमदार लक्ष्मण पवार यांच्या घरासमोर उभा असलेल्या गाडीवर दगडफेक करण्यात आली. या राड्यादरम्यान गाड्यांची तोडफोडही करण्यात आली. यानंतर पोलिसांनी तातडीने कार्यवाही करत जमाव पांगवला आहे.या राड्याच्या पार्श्वभूमीवर राज्य राखीव दलाची एक अतिरिक्त तुकडी देखील तैनात करण्यात आली

बीड शहरातील शाहू नगर भागातही राडा झालाय आहे.यावेळी दगडफेकीची घटना घडली आहे. दोन्ही राष्ट्रवादीच्या कार्यकर्त्यांमध्ये ही दगडफेक झाल्याची माहिती मिळाली आहे.

जळगावच्या मुक्ताईनगरांत केंद्रीय मंत्री रक्षा खडसे आणि पोलीस यांच्यात बाचाबाची झाल्याचे दिसून आले. केंद्रीय मंत्री रक्षा खडसे आणि पोलीस यांच्यात वाद झाला. मतदान केंद्रावर असलेल्या पोलिसांवरच रक्षा खडसे या संतापल्याचं दिसून आले होते. भाजपच्या उमेदवाराला केंद्रावर पोलिसांनी अडवल्यामुळे हा संताप झाला. त्यामुळे शहरात काही काळ गोंधळाचं वातावरण दिसून आल्या.

बदलापुरातही शिवसेना-भाजपचे कार्यकर्ते आमने -सामने आले आहेत. या दोन्ही पक्षांच्या कार्यकर्तेमध्ये धक्काबुक्की आणि हाणामारीची घटना घडली आहे.

पालघरच्या डहाणू येथे मतदान केंद्राबाहेर वाद झाला आहे.शिवसेनेचे उमेदवार राजेंद्र माच्छी आणि भाजप कार्यकर्ते आमने-सामने आले आहेत. भाजपचे कार्यकर्ते मतदान केंद्रामध्ये मोठ्या प्रमाणावर गर्दी करत असल्याने वाद झाल्याची माहिती आहे..यातूनच या दोन्ही पक्षांच्या वाद उफाळून आल्याची माहिती मिळतेय...

नाशिकच्या त्र्यंबकेश्वर इथल्या नूतन त्रंबकेश्वर विद्यालयातल्या मतदान केंद्रावर किरकोळ कारणावरून पोलीस आणि उमेदवार प्रतिनिधीमध्ये बाचाबाची झालीय

गावगाड्याच्या या निवडणुकीत मतदार मोठ्या संख्येनं उतरलेत. अनेक ठिकाणी मतदानासाठी लांबच लांब रांगा लागलेल्या पाहायला मिळाल्या. मात्र त्याचवेळी काही भागात हाणामारीच्या घटना घडल्यामुळं लोकशाहीच्या या उत्सवाला गालबोट लागलंय.