दोन्ही राष्ट्रवादी, दोन्ही शिवसेना एकत्र, भाजपला तगडी टक्कर, डहाणूमध्ये काय होणार?

डहाणू नगरपरिषद सार्वत्रिक निवडणुकीत आज भाजपकडून नगराध्यक्षपदासह २७ नगरसेवकांच्या जागांसाठी २७ उमेदवारी अर्ज दाखल करण्यात आले. यानंतर शिवसेना शिंदे गटाकडून पत्रकार परिषद घेण्यात आली असून यावेळी दोन्ही राष्ट्रवादी एकाच मंचावर आल्याचे पहायला मिळाले.

आम्ही स्थानिक उमेदवाराला प्राधान्य देणार असल्याचे सांगत शिवसेना शिंदे गटाचे नेते रवींद्र फाटक यांनी भाजपला आव्हान दिले आहे. तर भाजप विरोधात यावेळी दोन्ही राष्ट्रवादी, शिवसेना शिंदे गट यांच्यासोबत शिवसेना उद्धव बाळासाहेब ठाकरे गट आणि माकपचा देखील पाठिंबा मिळण्याची शक्यता रविंद्र फाटक यांनी बोलून दाखवली. भाजपविरोधात सर्वपक्षियांनी एकत्र येऊन निवडणूक लढवावी अशी जनतेची इच्छा असल्याचे अप्रत्यक्षपणे रविंद्र फाटक म्हणाले.

राज्यातील सर्वच नगर परिषद आणि नगर पंचायतीची विहित मुदत संपुष्टात आली होती. आधी ओबीसी आरक्षण आणि नंतर काही तांत्रिक कारणाने गेल्या दोन ते तीन वर्षांपासून निवडणुका रखडलेल्या होत्या. मात्र सर्वोच्च न्यायालयाच्या आदेशानंतर स्थानिक स्वराज्य संस्थांच्या निवडणुका मार्ग मोकळा झालेला असून पहिल्या टप्प्यांत नगर परिषद आणि नगर पंचायत निवडणुकांची घोषणा झाली आहे. पहिल्या टप्प्यात राज्यातील २४६ नगरपालिका आणि ४२ नगर पंचायतींच्या निवडणूक होणार आहे.

-अर्ज दाखल करण्याची तारीख -१० नोव्हेंबर २०२५

-अर्ज दाखल अंतिम मुदत- १७ नोव्हेंबर २०२५

-छाननीची तारीख-१८नोव्हेंबर २०२५

-माघार घेण्याची अंतिम मुदत २१ नोव्हेंबर २०२५

-अपील नसलेल्या ठिकाणी अंतिम मुदत- २५ नोव्हेंबर २०२५

-निवडणूक चिन्ह आणि अंतिम यादी- २६ नोव्हेंबर २०२५

-मतदानाचा दिवस -२ डिसेंबर २०२५