सदाभाऊ खोत यांची शरद पवारांवर टीका करताना जीभ घसरली, धक्कादायक वक्तव्य

शरद पवार आणि त्यांच्या बगलबच्च्यांनी बँका हाणल्या, कारखाने हाणले, तरी भागले नाही. तरीही भाषणांमधून महाराष्ट्र बदलायचा असे सांगत फिरतोय. तुला तुझ्या चेहऱ्यासारखा महाराष्ट्र करायचा आहे का? अशी टीका सदाभाऊ खोत यांनी केली.

महाविकास आघाडीवाले देवेंद्र फडणवीसांना का घेरायला लागली आहेत माहितीय का? आपण शेतकरी माणसं आहोत. आपल्या घरात गाय असते. राज्याची तिजोरी म्हणजे ही गाय आहे. गायीच्या कासेला चार थानं असातत. यामधील अर्ध थान वासऱ्याला पाजायचं (म्हणजे आपल्याला) आणि साडेतीन थानातलं दूध आपणचं हाणायचं, असा यांचा धंदा होता. पण चारही थानांचं दूध वासरांनाच द्यायचे काम फडणवीस यांनी केले. म्हणून पवारसाहेबांना माझ्या चिल्ल्यापिल्ल्यांचं कसं होणार? याची काळजी वाटू लागली, असे सदाभाऊत खोत म्हणाले.

गोपीचंद पडळकर जतमधून विधानसभा लढवत आहेत. त्यांना या विधानसभा निवडणुकीत निवडून द्या. जतचा विकास करून जत एक नंबरवर नेतो. येथील दुष्काळ हटवतो, असे आश्वासन उपमुख्यमंत्री देवेंद्र फडणवीस यांनी दिले. काही लोकांनी जतचा दुष्काळ पुसण्यासाठी किंचितही प्रयत्न केले नाहीत. जत तालुक्यातील 64 गावातील दुष्काळ आपण कायमचा हटवू, असे फडणवीस म्हणाले.