सोलापुरात पक्ष्यांसाठी वाटली 1 हजार मोफत जलपात्रे, माजी विद्यार्थ्यांचा अनोखा पाणपोई उपक्रम Video

सोलापूर जिल्ह्यात महाकाय असे उजनी धरण आहे. या ठिकाणी हजारो पक्षी शेकडो मैल प्रवास करून येतात. सोलापूर शहरातील हिप्परगा तलाव, छत्रपती संभाजी महाराज तलाव, सिद्धेश्वर तलाव तसेच होटगी तलाव या ठिकाणी विविध प्रजातीचे पक्षी आढळतात. सोलापूरच्या आजूबाजूचे वातावरण पक्षांसाठी पोषक असल्यामुळे पक्षांचे सोलापूर हे माहेरघर आहे. लोकांमध्ये पक्षांविषयी प्रेम जागृत व्हावे, पर्यावरणाबाबत जनजागृती व्हावी या उद्देशाने पाणपोई हा उपक्रम सुरू करण्याचा निर्णय घेण्यात आला आहे.

सोलापूरचे तापमान उन्हाळ्यामध्ये सरासरी 40 अंशाच्यावर राहते. त्यामुळे पक्ष्यांना पाणी शोधण्यासाठी मोठी कसरत करावी लागते. आपल्या घराभोवती, गॅलरीमध्ये तसेच बागेत नैसर्गिक चिवचिवाट वाढावा, म्हणून पक्ष्यांसाठी सर्वांनी पाणी ठेवावे म्हणून खास अहमदाबादमध्ये बनवलेली ही मातीची भांडी शहरवासीयांना दिली जाणार आहेत. एकूण 5 हजार जलपात्रे देण्याचा निर्णय घेण्यात आला. आज एक हजार जलपात्रांचे वितरण करण्यात आले.

या कार्यक्रमाचे शुभारंभ खासदार प्रणिती शिंदे, आमदार सुभाष देशमुख, पोलीस अधीक्षक डॉ. अतुल कुलकर्णी यांच्या हस्ते करण्यात आला.