महाडच्या राजकारणात भूकंप! भरत गोगावलेंचा विश्वासू म्हणून ओळखणाऱ्या नेत्याकडे मोठी जबाबदारी

अजित पवार, तटकरेंच्या उपस्थितीत नियुक्ती; गोगावले गटाला धक्का:

उपमुख्यमंत्री अजित पवार आणि प्रदेशाध्यक्ष सुनिल तटकरे यांच्या उपस्थितीत सुशांत जाबरे यांच्या नियुक्तीची घोषणा करण्यात आली. ही घोषणा केवळ जाबरे यांच्या सन्मानाची नाही, तर महाडमधील राजकीय समीकरणांवर थेट परिणाम करणारी ठरणार आहे. विशेषतः आगामी जिल्हा परिषद निवडणुकीच्या पार्श्वभूमीवर राष्ट्रवादी काँग्रेससाठी हा निर्णय 'गेम चेंजर' ठरू शकतो. मात्र, या निर्णयामुळे शिवसेनेचे (शिंदे गट) नेते भरत गोगावले यांच्या गटाला मोठा धक्का बसला आहे. सुशांत जाबरे हे यापूर्वी गोगावले यांचे अत्यंत 'विश्वासू' म्हणून ओळखले जात होते.

'दुर्लक्षित कार्यकर्त्याचा' विजय?

मागील काही काळापासून भरत गोगावले यांच्या शिबिरात त्यांच्या निष्ठावान कार्यकर्त्यांना योग्य स्थान मिळाले नाही अशी तीव्र नाराजी होती. याच नाराजीमुळे सुशांत जाबरे यांनी राष्ट्रवादी काँग्रेसमध्ये प्रवेश केला. आता पक्षप्रवेशानंतर लगेचच त्यांना राज्यस्तरीय पद मिळाल्याने, या संपूर्ण घटनेकडे "भरत गोगावले यांनी दुर्लक्षित केलेल्या कार्यकर्त्याचा विजय" म्हणून पाहिले जात आहे.

कुणबी समाज आणि तरुणाईत मजबूत पकड:

सुशांत जाबरे हे महाड तालुक्यातील कुणबी समाजाचे अत्यंत प्रभावशाली प्रतिनिधी मानले जातात. तरुण, ऊर्जावान आणि सातत्याने सामाजिक उपक्रमांमध्ये सक्रिय असलेल्या जाबरे यांनी गेल्या काही वर्षांत युवकांमध्ये मजबूत पकड निर्माण केली आहे. त्यांचा उत्तम संघटनात्मक दृष्टिकोन आणि जनसंपर्क यामुळे ते स्थानिक राजकारणात एक बलाढ्य युवा चेहरा म्हणून उदयास आले आहेत.

तटकरेंचा यशस्वी मास्टरस्ट्रोक:

प्रदेशाध्यक्ष सुनिल तटकरे यांनी हा प्रवेश आणि नियुक्ती मोठ्या कौशल्याने साध्य केली आहे. त्यांनी स्थानिक पातळीवर एक प्रभावी आणि कुणबी समाजाचे नेतृत्व उभे करण्यासाठी केलेली ही हालचाल राजकीय दृष्ट्या अत्यंत महत्त्वाची ठरली आहे. जाबरे यांच्या राज्यस्तरीय जबाबदारीमुळे राष्ट्रवादी काँग्रेसला महाडमध्ये केवळ संघटनात्मकच नव्हे, तर कुणबी समाज आणि युवा मतदारांमध्येही नवसंजीवनी मिळेल, असा विश्वास पक्षाच्या सूत्रांनी व्यक्त केला आहे. महाडच्या राजकारणात आता नव्या शक्तिसमीकरणांची चाहूल लागली आहे.