Mumbai Local : रेल्वे प्रवाशांनो लक्ष द्या! 'या' दिवशी लोकलच्या वेळापत्रकात होणार मोठा बदल; जाणून घ्या सविस्तर

महापरिनिर्वाण दिनानिमित्त शुक्रवार 5 डिसेंबरच्या मध्यरात्री परळ ते कल्याण आणि कुर्ला ते वाशी-पनवेल या मार्गांवर एकूण 12 विशेष लोकल गाड्या चालवण्याचा निर्णय घेण्यात आला आहे. या सर्व लोकल गाड्या मार्गावरील प्रत्येक स्टेशनवर थांबणार आहेत, त्यामुळे प्रवाशांना प्रवास करताना अडचण येणार नाही.

दादर स्थानकावरही मोठ्या प्रमाणावर यासंबंधित तयारी करण्यात आली आहे. आरपीएफचे जवान आणि अन् विभागातील मिळून 100 पेक्षा जास्त कर्मचारी येथे तैनात केले जाणार आहेत, जे गर्दी नियंत्रण, सुरक्षा आणि इतर आवश्यक कामकाज पाहतील. यामुळे स्टेशन परिसरातील गोंधळ कमी होईल आणि प्रवासी सुरक्षितपणे हालचाल करू शकतील.

याचबरोबर दादर स्टेशनपासून चैत्यभूमीपर्यंत जाणाऱ्या मुख्य रस्त्यावर दिशादर्शक फलक लावण्याची तयारीही करण्यात आली आहे. या फलकांमुळे चैत्यभूमीकडे जाणाऱ्या अनुयायांना योग्य मार्गदर्शन मिळेल आणि गर्दीचे नियोजनही सुरळीत होईल. इतकेच नाही तर चैत्यभूमीवर अतिरिक्त तिकीट काउंटरची सोयही करण्यात आली आहे. यामुळे परतीच्या प्रवासासाठी तिकीट घेणाऱ्यांना वेगाने सेवा मिळेल आणि लांब रांगांची समस्या कमी होईल.

महापरिनिर्वाण दिनी दादर परिसरात प्रचंड गर्दी होत असल्याने प्रत्येक वर्षी रेल्वे प्रशासन, पोलिस विभाग आणि स्थानिक संस्था यांच्याकडून विशेष व्यवस्था केली जाते. यावर्षीही त्याच पद्धतीने सर्व विभागांनी संयुक्तपणे नियोजन केले असून, प्रवाशांना कोणत्याही प्रकारची अडचण येऊ नये यासाठी सर्व यंत्रणांची तयारी पूर्ण झाली आहे. अनुयायी शांततेत आणि सुव्यवस्थित पद्धतीने चैत्यभूमीला भेट देऊ शकावेत, यासाठी या सर्व उपाययोजना करण्यात आल्या आहेत.