नितीश कुमार यांना CM पदाची खुर्ची 'कुर्बान' करावी लागणार? भाजपच्या सत्ता समीकरणाची जुळवाजुळव झाली!

मुंबई : बिहार विधानसभा निवडणुकीत राष्ट्रीय लोकशाही आघाडी अर्थात एनडीएने २०० हून अधिक जागांवर आघाडी मिळवत २०१० सालच्या विजयाची पुनरावृत्ती केली आहे. महाराष्ट्र विधानसभा निवडणुकीप्रमाणेच बिहारमध्येही लाडकी बहीण फॅक्टरचा प्रभाव दिसून आला. १ कोटी महिलांच्या खात्यात तब्बल १० हजार रूपये सरकारी तिजोरीतून टाकल्याने महिला वर्गाने एनडीएला भरभरून मतरुपी दान दिले. महाराष्ट्रात भाजपला जसे निर्विवाद यश मिळाले तसे बिहारमध्येही भाजपने कमाल केली. तब्बल ९३ जागांवर भाजपने विजयी आघाडी घेतली आहे तर नितीश कुमार यांचा जेडीयू ८४ जागांवर आघाडीवर आहे. यंदा काहीही करून बिहारमध्ये मुख्यमंत्रि‍पदावर भाजपचा व्यक्ती बसलाच पाहिजे, असे भाजपचे स्वप्न आहे. त्या स्वप्नाला मतदारांनी देखील साथ दिली आहे. परंतु बिहारच्या नेतृत्व बदलाकडे स्वत: नितीश कुमार कसे पाहतात, त्यांची भूमिका काय राहणार, याकडे देशाचे लक्ष लागले आहे. जेडीयूचा कमालीचा परफॉर्मन्स असतानाही सकाळपासून दुपारी चार वाजेपर्यंत नितीश कुमार यांनी कोणतीही प्रतिक्रिया न दिल्याने त्यांच्या मनात नेमकं काय चाललंय? याची चर्चा होत आहे. महत्त्वाचे म्हणजे नेतृत्वबदलासाठी नितीश कुमार प्रतिकूल असले तरीही चिराग पासवान आणि इतर छोट्या पक्षांना सोबत घेऊन भाजप सत्तेत बसत असल्याने नितीश कुमार हे मौनव्रतात आहेत का? अशी चर्चा राजकीय वर्तुळात आहे.