Milk Business : महिन्याला निव्वळ 1 लाख नफा, सोलापूरकर तरुण शेतकऱ्याचा सोपा फॉर्म्युला!

सोलापूर जिल्ह्यातील मोहोळ तालुक्यातील रामहिंगणी गावातील शेतकरी सचिन माशाळ हे हरियाणा आणि सोलापूरी जातीच्या म्हशीचे पालन करत आहेत.

हरियाणा आणि सोलापूरी जातीच्या म्हशीच्या दूध विक्रीतून सचिन माशाळ हे सर्व खर्च वजा करून महिन्याला 1 लाख रुपयांचे उत्पन्न घेत आहेत. या संदर्भात अधिक माहिती सचिन माशाळ यांनी लोकल 18 शी बोलताना दिली.

सचिन माशाळ यांच्याकडे हरियाणा आणि सोलापूरी जातीच्या म्हशी मिळून एकूण 22 म्हशी आहेत. सचिन यांचा दूध व्यवसाय हा वडिलोपार्जित व्यवसाय आहे.

हरियाणा जातीच्या म्हशी जास्त दूध देणाऱ्या म्हशी म्हणून ओळखल्या जातात. एका हरियाणा जातीच्या म्हशी पासून सचिन माशाळ यांना 9 लिटर पर्यंत दूध मिळते.

तसेच सचिन यांच्याजवळ सोलापूरी म्हशी सुद्धा असून त्यांच्यापासून त्यांना 4 ते 5 लिटर दूध मिळत आहे. सध्या म्हशीच्या दुधाला 70 ते 80 रुपये लिटर भाव मिळत आहे.

तर सचिन माशाळ हे दररोज 100 ते 150 लिटर दूध विक्री करत आहेत. तर म्हशीचा चारा, वैरण आदी खर्च वजा करून दहावीपर्यंत शिक्षण शिकलेले सचिन माशाळ हे महिन्याला 1 लाख रुपयांचे उत्पन्न या दूध विक्रीतून घेत आहेत.

म्हशींना चांगला चारा दिला आणि त्यांची काळजी घेतली तर त्या म्हशी 9 लिटरपेक्षाही अधिक दूध देऊ शकतात. शेतकऱ्यांनी शेती करत करत पशुपालनाकडे लक्ष दिल्यास शेतकऱ्यांना अधिकाधिक उत्पन्न मिळेल, असा सल्ला पशुपालक सचिन माशाळ यांनी दिला आहे.