Rinku Rajguru : स्मिता पाटीलसोबत तुलना, रिंकू राजगुरू म्हणाली, 'मला वाईट वाटतं की...'

अभिनेत्री रिंकू राजगुरूचा आशा हा सिनेमा लवकरच प्रेक्षकांच्या भेटीला येत आहे. या सिनेमासाठी रिंकूला सर्वोत्कृष्ट अभिनेत्रीचा राज्य पुरस्कार देऊन गौरवण्यात आलं. रिंकूसाठी हा सिनेमा खूप खास आहे.

आशाच्या प्रमोशननिमित्तानं रिंकू अनेक मुलाखती देतेय. एका मुलाखतीत बोलताना रिंकूने तिची दिवंगत अभिनेत्री स्मिता पाटीलशी होणाऱ्या तुलनेविषयी भाष्य केलं.

रिंकू सोशल मीडियावर अनेक फोटो शेअर करत असते, ते पाहून अनेकदा तिला तू स्मिता पाटील यांच्यासारखी दिसते किंवा तुला पाहिलं की स्मिता पाटील यांचा भास होतो असं म्हटलं जातं.

नवशक्तिला दिलेल्या मुलाखतीत स्मिता पाटील यांच्यासोबतच्या तुलनेविषयी बोलताना रिंकू म्हणाली, "तुलना होते हीच गोष्ट माझ्यासाठी खूप मोठी गोष्ट आहे. मीही अनेकदा वाचलं की लोक माझे फोटो पाहून स्मिता पाटील यांची आठवण येते म्हणतात. आम्हाला तसा भास होतो."

"पण मला वाईटही वाटतं की त्याकाळी त्यांना अशाच प्रकारचा सिनेमा करुन लोकांना सांगावं लागत होतं आणि आज मलाही अशाच प्रकारचा सिनेमा करुन लोकांना सांगावं लागतंय की आता बदला.. आता याची आपल्याला गरज आहे."

"कितीही काळ गेला तरी बाईला स्ट्रगल आजपर्यंत चुकलेला नाही. अशाप्रकारच्या भूमिका मला करायला मिळतायेत याबद्दल खूप छान वाटतंय."

रिंकू पुढे म्हणाली,"उंबरठाचा विषय काढला तर खरंतर मी स्मिता पाटील यांच्या सिनेमांच्या जवळपासही नाही पण तशा प्रकारची कामं तरी माझ्या वाट्याला येत आहे आणि त्या पद्धतीनं मला महिलांची बाजू मांडता येत आहे. कुठेतरी हा सिनेमा बघून नक्कीच लोक विचार करतील."

स्मिता पाटील रिंकूची आवडती आणि इन्स्पिरेशन असलेली अभिनेत्री आहे. स्मिता पाटील यांच्याविषयी बोलताना रिंकू म्हणाली, "मी त्यांचे बरेच सिनेमेही पाहिले आहेत. स्मिता आणि मी हे पुस्तक मी वाचलं होतं त्यांचं, त्यांच्याविषयी त्यात लिहिलं होतं. ते पुस्तक वाचताना मी स्वत: ला खूप रिलेट करत होते. माझे आणि त्यांचे विचार आणि मत किती जुळतात हे मला जाणवलं.मी त्यांच्या कामाचं खूप निरीक्षण करते. त्या मला आणखी आपल्या वाटायला लागल्या."