मुंबई-नाशिक लोकलचं स्वप्न पूर्ण होणार! नव्या रूटला मंजूरी, मार्ग कसा जोडला जाणार?

नाशिक- मुंबई रेल्वे मार्गावर मोठी सुधारणा होणार असल्याची माहिती समोर आली आहे. केंद्र सरकारने मनमाड-कसारा आणि कसारा-मुंबई या मार्गांवर प्रत्येकी दोन नवीन रेल्वे मार्गिका उभारण्यास मंजुरी दिलेली असून या निर्णयामुळे नाशिक ते मुंबईदरम्यान लोकल सेवा सुरू होण्यास गती मिळणार आहे आणि अनेक वर्षांपासून प्रलंबित असलेल्या नवीन गाड्यांसाठीच्या स्लॉट समस्येचेही समाधान होईल, असा विश्वास खासदार राजाभाऊ वाजे यांनी व्यक्त केला आहे.

एवढेच नाही तर नाशिककरांचे अनेक वर्षांपासूनची मुख्य मागणी होती की नाशिक-मुंबई लोकल सेवा सुरू व्हावी तसेच नवीन एक्स्प्रेस आणि पॅसेंजर गाड्याही वाढवाव्यात.पण पूर्वी रेल्वे प्रशासनाकडून नेहमी सांगितले जात असे की कोणतेही स्लॉट उपलब्ध नाहीत.

यानंतर रेल्वे मार्गिकांची अपुरी क्षमता ही सर्व समस्यांचे मुख्य कारण असल्याचे लक्षात येताच खासदार वाजे यांनी हा मुद्दा केंद्रीय रेल्वे मंत्रालयाकडे मांडला आणि याचा पाठपुरावाही सुरू ठेवला

सध्याच्या मार्गावर प्रचंड गर्दी असते. वेगवेगळ्या गाड्या तासन्‌तास कोंडीत अडकतात, अप-डाउनच्या मार्गांची मर्यादा आहे, मालगाड्यांची संख्या वाढत आहे आणि सिग्नलिंगवर ताण आहे. या समस्यांमुळे नवीन सेवा सुरू करणे शक्य नव्हते.

त्यामुळे खासदार वाजे यांनी मनमाड-कसारा आणि कसारा-मुंबई या मार्गांवर स्वतंत्र दोन-दोन रेल्वे मार्गिका उभारण्याची मागणी केली. रेल्वे मंत्रालयाने आता यासाठी मान्यता दिलेली आहे.

या दोन नवीन मार्गिकांमुळे रेल्वे गाड्यांची संख्या मोठ्या प्रमाणात वाढवता येईल. लोकल ट्रेनचा मार्ग मोकळा होऊन त्यावरचा भार कमी होईल. त्यामुळे कसारा मार्गावर धावणाऱ्या लोकलच्या वेळापत्रकात सुधारणा होण्याची शक्यता आहे. सध्या मालवाहतूक आणि इतर गाड्यांमुळे लोकलला उशिर होतो, पण या मार्गिकांवर मालगाड्या वळवल्या गेल्या तर लोकल सेवेला गती मिळेल.

या सर्व गोष्टींचा विचार करता नाशिक-मुंबई लोकल प्रकल्पाला आता गती मिळणार आहे, प्रवास वेगवान होईल, रेल्वे मार्गावरचा ताण कमी होईल आणि प्रवाशांना आरामदायक आणि वेळेवर सेवा मिळेल. हे प्रकल्प पूर्ण झाल्यावर नाशिक- मुंबई रेल्वे प्रवास अधिक सोयीस्कर आणि जलद होईल.