Mohammed Shami : काव्याचा मोहम्मद शमीला धक्का, SRH ने सोडली साथ, आता या टीमकडून खेळणार IPL

ईएसपीएनक्रिकइन्फोच्या अहवालानुसार, दोन्ही फ्रँचायझींनी शमीसाठी खरेदी-विक्री करण्यास सहमती दर्शविली आहे. आता, ते फक्त शमीच्या मंजुरीची वाट पाहत आहेत. आयपीएलने फ्रँचायझींना त्यांच्या 2025 च्या संघातून रिलीज करू इच्छिणाऱ्या खेळाडूंची यादी सादर करण्यासाठी 15 नोव्हेंबर रोजी दुपारी 3 वाजताची अंतिम मुदत दिली आहे.

मार्चमध्ये चॅम्पियन्स ट्रॉफीच्या अंतिम फेरीत खेळल्यापासून 35 वर्षीय मोहम्मद शमीला भारतीय संघात पुन्हा स्थान मिळालेले नाही. शमी सध्या रणजी ट्रॉफीमध्ये बंगालकडून खेळत आहे. शमीने कबूल केले की तो कठीण काळातून जात आहे. वेस्ट इंडिजविरुद्धच्या घरच्या कसोटी मालिकेसाठी आणि दक्षिण आफ्रिकेविरुद्धच्या दोन कसोटी सामन्यांच्या मालिकेसाठी शमीचा संघात समावेश नव्हता.

2022-24 च्या आयपीएल हंगामात गुजरात टायटन्ससाठी मोहम्मद शमीचा हंगाम उत्तम राहिला. त्याने पॉवरप्लेमध्ये आपले कौशल्य दाखवले. त्यानंतर, गेल्या हंगामात आयपीएल 2025 च्या लिलावात एसआरएचने त्याला 10 कोटी रुपयांना विकत घेतले. आयपीएल 2022 आणि 2023 मध्ये त्याने पहिल्या सहा ओव्हरमध्ये 28 बळी घेतले. दुखापतीमुळे तो आयपीएल 2024 मध्ये खेळू शकला नाही. यानंतर, गेल्या हंगामात त्याची कामगिरी तितकी चांगली नव्हती.

लखनऊ सुपर जायंट्समध्ये, मोहम्मद शमी भारताचे माजी बॉलिंग प्रशिक्षक भरत अरुण यांच्यासोबत पुन्हा एकत्र येणार आहे. अरुणने गेल्या दशकातील भारतातील सर्वात यशस्वी बॉलिंग युनिटपैकी एक विकसित करण्यात महत्त्वाची भूमिका बजावली, शमी, जसप्रीत बुमराह, इशांत शर्मा, उमेश यादव आणि मोहम्मद सिराज यांच्यासोबत अरुणनी जवळून काम केले.

लखनऊ सुपर जाएंट्सला मागच्या काही काळापासून त्यांचे फास्ट बॉलर आवेश खान, मयंक यादव आणि मोहसिन खान यांच्या फिटनेसमुळे अडचणींचा सामना करावा लागला आहे. हे तीनही खेळाडू सध्या दुखापतींमुळे पुनर्वसन प्रक्रियेतून जात आहेत, त्यामुळे ते देशांतर्गत क्रिकेट खेळत नाहीयेत. मयंकने जूनमध्ये पाठीच्या दुखापतीवर उपचार करण्यासाठी शस्त्रक्रिया केली होती, तर मोहसिन डिसेंबरमध्ये सय्यद मुश्ताक अली ट्रॉफीमध्ये उत्तर प्रदेशकडून खेळताना झालेल्या दुखापतीतून बरा होत आहे. आवेश त्याच्या उजव्या गुडघ्याच्या दुखापतीतून बरा होत आहे.