Team India : पहिल्या T20 विजयानंतर टीम इंडियाला धक्का, मॅच विनर खेळाडू सीरिजमधून बाहेर!

भारतीय वनडे टीमचा उपकर्णधार श्रेयस अय्यरच्या दुखापतीबाबत एक मोठी अपडेट समोर आली आहे. ऑस्ट्रेलिया दौऱ्यातील शेवटच्या वनडे सामन्यात अय्यरला पोटाची दुखापत झाली होती. ताज्या माहितीनुसार, अय्यरला जानेवारीमध्ये न्यूझीलंडविरुद्धच्या वनडे सीरिजमधूनही बाहेर पडावे लागले आहे. पण, पंजाब किंग्जला सुटकेचा नि:श्वास सोडता येईल कारण अहवालानुसार तो आयपीएल 2026 पूर्वी तंदुरुस्त होऊ शकतो.

श्रेयस अय्यरने यापूर्वी गंभीर दुखापतींनंतर प्रभावी पुनरागमन केले आहे. खांद्याच्या दुखण्यानंतर त्याने टेस्ट पदार्पणात शतक झळकावले. पाठीच्या शस्त्रक्रियेनंतर तो तंदुरुस्त झाला आणि 2023 च्या वनडे वर्ल्ड कपमध्ये त्याने चमकदार कामगिरी केली. ऑस्ट्रेलियाविरुद्धच्या तिसऱ्या वनडे सामन्यात फिल्डिंग करताना अय्यरला दुखापत झाली होती. बरगड्यांच्या खाली (प्लीहामध्ये) अंतर्गत रक्तस्त्राव आढळून आल्यानंतर त्याला सिडनी येथील रुग्णालयात दाखल करण्यात आले. तो सध्या मुंबईत आहे आणि त्याचा पुढील अल्ट्रासाऊंड या आठवड्यात होणार आहे.

इंडिया टुडेच्या वृत्तानुसार, अय्यरचा पुढील अल्ट्रासाऊंड स्कॅन या आठवड्यात होणार आहे. ही एक महत्त्वाची चाचणी असेल जी त्याच्या फिटनेसचा पुढील टप्पा निश्चित करेल. या स्कॅनची तपासणी या प्रकरणाची देखरेख करणारे अव्वल तज्ज्ञ डॉ. दिनशॉ पार्डीवाला करतील. डॉ. दिनशॉ पार्डीवाला यांनी ऋषभ पंत, जसप्रीत बुमराह, रवींद्र जडेजा आणि इतर अनेक स्टार क्रिकेटपटूंच्या दुखापतींदरम्यान देखील उपचार केले आहेत. जर वैद्यकीय मंजुरी मिळाली तर अय्यर ताबडतोब बंगळुरूमधील बीसीसीआय सेंटर ऑफ एक्सलन्स (सीओई) येथे पुनर्वसन सुरू करेल.

श्रेयस अय्यर सध्या फक्त सामान्य दैनंदिन व्यायाम करू शकतो. पोटात दाब वाढवणारी कोणतीही व्यायाम त्याला करण्याची परवानगी नाही. पुढील फेरीच्या स्कॅननंतर त्याला बॅटिंग, फिल्डिंग यासारख्या क्रिकेटशी संबंधित ट्रेनिंग पुन्हा सुरू करण्याची परवानगी असेल. सुरुवातीच्या अंदाजानुसार अय्यर दोन महिन्यांत बरा होईल असे सुचवले गेले होते, पण दुखापतीची तीव्रता पाहता, सावधगिरी बाळगणे आवश्यक आहे.

पंजाब किंग्जचा कर्णधार श्रेयस अय्यर आयपीएल 2026 मध्ये परतू शकतो. त्याच्या नेतृत्वाखाली पंजाबची टीम गेल्या वर्षी अंतिम फेरीत पोहोचली होती. आता श्रेयस अय्यर आयपीएलसाठी फिट होण्याची शक्यता आहे, त्यामुळे पंजाबसाठी हा दिलासा म्हणावा लागेल.