Smriti Mandhana : स्मृती-पलाशचं लग्न होणार का नाही? वादळ शमल्यानंतर मानधनाच्या भावाची पहिली रिएक्शन

मानधना आणि पलाश गेल्या महिन्यात 20 नोव्हेंबरपासून त्यांच्या लग्नाची तयारी करत होते. लग्न 23 नोव्हेंबर रोजी सांगलीमध्ये होणार होते, पण ते अचानक पुढे ढकलण्यात आले. लग्न पुढे ढकलण्याचे अधिकृत कारण मानधना यांच्या वडिलांची बिघडलेली प्रकृती होती. पण, त्यानंतर, सोशल मीडियावर वेगवेगळे दावे केले गेले, ज्यात पलाश मुच्छलने स्मृतीला धोका दिल्याने लग्न झालं नाही, असा दावाही केला गेला.

लग्न पुढे ढकलल्यानंतर, पलाश मुच्छल याचे नाव पहिले मेरी डि'कोस्टा नावाच्या कोरिओग्राफरशी जोडले गेले. मेरीसोबतचे पलाशचे कथित चॅट्सही सोशल मीडियावर व्हायरल झाले, पण मेरीने हे चॅट्स आपले नसल्याचं स्पष्टीकरण दिलं. यानंतर पलाशचे नाव नंदिका द्विवेदी आणि गुलनाज खान नावाच्या महिलांसोबतही जोडलं गेलं. या संपूर्ण घटनाक्रमानंतर पलाशलाही धक्का बसला आणि तब्येत बिघडल्यामुळे त्याला रुग्णालयात दाखल करण्यात आलं. आता 10 दिवसांनंतर पुन्हा एकदा पलाश-स्मृतीच्या लग्नाच्या चर्चा सुरू झाल्या आहेत.

लग्न पुढे ढकलण्यात आल्यानंतर पलाश मुच्छल पहिल्यांदाच सार्वजनिक ठिकाणी दिसला. याव्यतिरिक्त, सोशल मीडियावर असे दावे करण्यात येत आहेत की पलाश आणि स्मृती या महिन्यात 7 डिसेंबर रोजी जवळच्या कुटुंबातील सदस्यांच्या उपस्थितीत लग्न करणार आहेत. स्मृती मानधानाच्या भावाने व्हायरल होणाऱ्या लग्नाच्या नवीन तारखेबद्दल प्रतिक्रिया दिली आहे.

हिंदुस्तान टाईम्सशी बोलताना, स्मृतीचा भाऊ श्रवण मंधाना म्हणाला, 'मला लग्नाच्या नवीन तारखेबद्दल काहीही माहिती नाही. सध्या तरी लग्न पुढे ढकलण्यात आले आहे.' स्मृतीच्या भावाच्या विधानावरून स्पष्ट होते की पलाश किंवा स्मृतीच्या कुटुंबाने अधिकृतपणे लग्नाच्या तारखेची पुष्टी केलेली नाही, त्यामुळे व्हायरल होत असलेल्या लग्नाच्या तारखा या अफवा आहेत, असंच म्हणावं लागेल.