भारतातातला सर्वांत पहिला मेलडी रोड, आता कोस्टल रोडला मिळणार नवी ओळख, 'जय हो' ची वाजणार धून

मुंबईच्या दक्षिणेकडून उत्तरेकडे जाणाऱ्या कोस्टल रोडवर मरीन ड्राइव्ह बोगद्यातून बाहेर पडल्यावर अमरसन्स गार्डन ते ब्रिच कँडी दरम्यान पहिल्या मार्गिकेतील सुमारे 700 मीटर रस्त्यावर वाहनचालकांना या मेलडी रोडचा अनुभव घेता येणार आहे. हंगेरियन तंत्रज्ञानाच्या माध्यमातून या रस्त्यावर विशेष संगीतमय रिब्स (पट्ट्या) बसविण्यात आल्या आहेत. या पट्ट्यांमधील विशिष्ट अंतर आणि त्यावरून जाणाऱ्या वाहनाच्या चाकाचे होणारे घर्षण यामुळे स्वरांची निर्मिती होते. हे स्वर त्या वाहनातील प्रवाशांना ऐकू येतात. मेलडी रोडवरील स्वरांचा आनंद घेण्यासाठी ताशी 80 किमी प्रति तास वेगाने वाहन त्या विशिष्ट मार्गिकेवरून जाणे अपेक्षित आहे. आंतरराष्ट्रीय दर्जाचे अद्ययावत तंत्रज्ञान, भारतीय संस्कृती आणि संगीताचा सुंदर मिलाफ म्हणून मेलडी रोडचा हा प्रकल्प देशभरात कुतूहलाचा विषय ठरणार आहे.

advertisement

मुंबई महानगरपालिकेच्या विशेष निधीतून रुट्स वर्ल्डवाइड इंडिया आणि हंगेरियन कंपनी यूटीकोप्रो यांच्यावतीने उभारण्यात आलेल्या या मेलडी रोडचे लोकार्पण बुधवारी दुपारी राज्याचे मुख्यमंत्री देवेंद्र फडणवीस आणि उपमुख्यमंत्री एकनाथजी शिंदे यांच्या हस्ते तसेच माजी खासदार राहुल शेवाळे, मुंबई महानगरपालिका आयुक्त आणि हंगेरियन दूतावासातील वरिष्ठ अधिकाऱ्यांच्या उपस्थितीत केले जाणार आहे.

हंगेरी, जपान, चायना, अमेरिका या देशांमध्ये काही वर्षांपासून मेलडी रोडची संकल्पना अस्तित्वात आहे. आपल्या देशात आणि खास करून देशाची आर्थिक राजधानी असणाऱ्या मुंबईत मेलडी रोड करावा, यासाठी गेल्या 2 वर्षांपासून मी पाठपुरावा करत होतो. हे तंत्रज्ञान समजून घेण्यासाठी मी स्वतः युरोपात जाऊन आलो. कोस्टल रोड हे मुंबईच्या वेगवान दळणवळणाचे एक प्रतीक मानले जाते. इथे उभारण्यात आलेला मेलडी रोड हा देशातील आणि जगभरातील पर्यटकांसाठी नवीन आकर्षण ठरेल, याची मला खात्री आहे. हा प्रकल्प पूर्ण करण्यासाठी केलेल्या सहकार्याबद्दल माननीय मुख्यमंत्री, उपमुख्यमंत्री, पालिका आयुक्त आणि सर्व अधिकारी वर्गाचे आभार मानतो, असं माजी खासदार राहुल शेवाळे म्हटले.

मेलडी रोड विषयी

- भारतातला पहिलावहिला मेलडी रोड

- दक्षिणेकडून उत्तरेकडे जाताना मरीन ड्राइव्हवरील बोगदा संपल्यावर मेलडी रोड

- पहिल्या मार्गिकेवर 700 मीटर पर्यंत विशेष पट्ट्या

- रस्त्यावरील विशेष पट्ट्या आणि वाहनाच्या चाकांच्या घर्षणातून स्वरांची निर्मिती

- वाहनातील प्रवाशांना कोणत्याही वेगळ्या उपकरणाशिवाय वाहनात ऐकू येणार जय हो

- जगभरातील संगीतविश्वात भारतीय संगीताला नवी ओळख मिळवून दिलेल्या स्लमडॉग मिलेनियर चित्रपटातील जय हो गाण्याची पालिकेकडून निवड.

- मुंबईतील वातावरण, विविध ऋतू, समुद्रावरील वाऱ्याचा वेग यातही हा सांगितिक अनुभव कायम राहणार आहे.

- 11 फेब्रुवारीपासून वाहनचालकांना घेता येणार मेलडी रोडवरील संगीताचा आस्वाद.