TRENDING:
अजित पवार यांचा दशक्रिया विधी होईपर्यंत बारामतीत थांबलेल्या सुनेत्रा पवार सोमवारी मुंबईला आल्या. उपमुख्यमंत्रिपदाचा कार्यभार स्वीकारण्याआधी त्यांनी डॉ. आंबेडकर यांच्या स्मृतींना चैत्यभूमीवर जाऊन वंदन केले तसेच सिद्धीविनायकाच्या चरणी लीन झाल्या. त्यानंतर सकाळी ११ वाजताच्या सुमारास त्यांनी मंत्रालयात पाऊल ठेवले. अजित पवार यांच्या स्मृतीला वंदन करून त्यांनी राज्यातील लोकांच्या सेवेसाठी प्रण केला. यावेळी सगळेच भावुक झाले होते.
advertisement
...अन् पार्थ पवार यांच्या डोळ्यातून अश्रू ओघळले
अजित पवार यांनी महाराष्ट्रासारख्या मोठ्या राज्याची तब्बल सहा वेळा उपमुख्यमंत्रिपदाची जबाबदारी सांभाळली. त्याच खुर्चीवर आई सुनेत्रा पवार यांना बसताना पाहून पार्थ पवार यांच्या डोळ्यातून अश्रू ओघळले. उपस्थित असणाऱ्या नेत्यांनी आणि पदाधिकाऱ्यांनी पार्थ पवार यांना आधार दिला. मात्र ते बऱ्याच वेळ हुंदक्यांनी दाटले. गत काही वर्षांतील आठवणींचा पट पार्थ पवार यांच्या डोळ्यासमोर गेला असावा, त्यामुळेच ते कमालीचे भावुक झाले, असे उपस्थित पदाधिकाऱ्यांनी सांगितले.
कॅबिनेटलाही हजेरी लावणार
राज्य मंत्रिमंडळाची आज बैठक होणार आहे. या बैठकीला पहिल्यांदाच उपमुख्यमंत्री म्हणून सुनेत्रा अजित पवार उपस्थित राहणार आहे. त्याआधी राष्ट्रवादीच्या प्रमुख नेत्यांसह त्यांनी प्रि-कॅबिनेटला हजेरी लावली.
सुत्रे स्वीकारण्याआधी बाबासाहेबांना वंदन, नंतर बाप्पाला वंदन
उपमुख्यमंत्री सुनेत्रा अजित पवार यांनी दादर येथील चैत्यभूमीवर भारतरत्न डॉ. बाबासाहेब आंबेडकर यांना अभिवादन केले. यावेळी विधानसभेचे उपाध्यक्ष अण्णा बनसोडे, राष्ट्रवादीचे नेते खासदार प्रफुल्ल पटेल, खासदार सुनील तटकरे, राज्य महिला आयोगाच्या अध्यक्षा रूपाली चाकणकर, डॉ. बाबासाहेब आंबेडकर महापरिनिर्वाण दिन समन्वय समितीचे सरचिटणीस नागसेन कांबळे, युवा नेते पार्थ अजित पवार यांच्यासह मान्यवर उपस्थित होते. त्यानंतर त्यांनी प्रभादेवी येथील श्री सिद्धिविनायक गणपतीचे दर्शन घेतले. यावेळी श्री सिद्धिविनायक गणपती मंदिर न्यासाचे अध्यक्ष सदानंद सरवणकर यांच्यासह मान्यवर उपस्थित होते.