Mumbai Water Cut : मुंबईत पाणीकपातीचं मोठं संकट,मंगळवारी कोणकोणत्या भागात पाणीपुरवठा बंद राहणार?

पाली हिल जलाशयाच्या जलवाहिनीत गळती

पाली हिल जलाशयाला पाणीपुरवठा करणाऱ्या जलवाहिनीत गळती आढळून आल्याने मुंबई महानगरपालिकेने तातडीने दुरुस्ती काम हाती घेण्याचा निर्णय घेतला आहे. ही जलवाहिनी वांद्रे पश्चिम येथील कुरेशी नगर झोपडपट्टीजवळून महाराष्ट्र गृहनिर्माण आणि क्षेत्र विकास प्राधिकरणाच्या मोकळ्या भूखंडातून तसेच पश्चिम द्रुतगती महामार्गालगत जाते. या ठिकाणी मोठ्या प्रमाणात गळती होत असल्याने पाणी वाया जात असून संभाव्य धोका लक्षात घेता महापालिकेने दुरुस्तीचे काम तातडीने करण्याचा निर्णय घेतला आहे.

advertisement

कधीपर्यंत सुरु राहणार काम?

हे दुरुस्ती काम मंगळवार 10 फेब्रुवारी रोजी सकाळी 10 वाजता सुरू होणार असून मध्यरात्री 12 वाजेपर्यंत पूर्ण होईल असा दावा जल अभियंता विभागाने केला आहे. या कालावधीत एच पश्चिम विभागातील अनेक भागांचा पाणीपुरवठा तब्बल 14 तासांसाठी पूर्णपणे बंद राहणार आहे तर काही भागांमध्ये कमी दाबाने पाणीपुरवठा केला जाणार आहे.

'या' भागात पाणीपुरवठा पूर्ण बंद

वांद्रे पश्चिमेतील हिल रोड, पेरी रोड, कार्टर रोड, पाली गाव, चिंबई गाव, शेर्ली गाव, कांतवाडी परिसर, खार दांडा, कोळीवाडा, चुईम गावठाण, पाली हिल, युनियन पार्क, तसेच खार पश्चिमेतील काही रस्त्यांचा समावेश आहे. याशिवाय चॅपल रोड, के. सी. रोड, एल. के. मेहता मार्ग, नर्गिस दत्त रोड, पाली माला परिसरातील नागरिकांनाही याचा फटका बसणार आहे.

दरम्यान हिल रोडच्या टोकापासून ताज लँड्स एन्ड, बी. जे. रोड, एच. के. भाभा मार्ग, काणे मार्ग आणि गणेश झोपडपट्टी परिसरात कमी दाबाने पाणीपुरवठा करण्यात येणार असून मध्यरात्रीनंतर 1 ते पहाटे 4.30 या वेळेत पाणी दिले जाईल.

महापालिकेने नागरिकांना दुरुस्तीपूर्वी आवश्यक पाणीसाठा करून ठेवण्याचे पाणी काटकसरीने वापरण्याचे आणि पुढील काही दिवस खबरदारी म्हणून पाणी उकळून आणि गाळून पिण्याचे आवाहन केले आहे.