सुवर्णनगरी जळगावात 4 तासांत सोनं 8 हजारांनी स्वस्त! चांदीही 20 हजारांनी घसरली

नितीन नांदुरकर, जळगाव : डॉलरच्या तुलनेत रुपयाची घसरण, कच्च्या तेलाच्या वाढत्या मागणीसह आखाती देशांतील युद्धजन्य परिस्थितीचा थेट परिणाम आता सुवर्णनगरी जळगावच्या सराफ बाजारावर स्पष्टपणे दिसतोय. कारण सोन्याच्या चांदीच्या किंमतीत सातत्याने घसरण सुरूये.

मार्च महिन्यातील अवघ्या 23 दिवसांत सोन्याच्या दरात तब्बल 34 हजार रुपयांची घसरण नोंदवलीये. विशेष म्हणजे, आजच्या दिवसातच अवघ्या चार तासांत सोन्याचे दर 8 हजारांनी कोसळले, तर चांदीत तब्बल 20 हजारांची मोठी घसरण झाली. या अनपेक्षित घसरणीमुळे सराफ बाजारात ग्राहकांची एकच झुंबड उडालीये.

लग्नसराईचा सीझन आणि आगामी सण-उत्सवांच्या पार्श्वभूमीवर सोने-चांदी खरेदीसाठी नागरिक मोठ्या संख्येने बाजारात दाखल होताय. दर घसरल्यामुळे ग्राहकांमध्ये आनंदाचे वातावरण आहे. जळगावच्या सुवर्णनगरीत दिवसभर खरेदीसाठी मोठी गर्दी पाहायला मिळतेय.

दरम्यान, आज सोन्याचा दर जीएसटीसह सुमारे 1 लाख 44 हजार रुपये (10 ग्रॅम) इतका असून, चांदीचा दर 2 लाख 30 हजार रुपये (प्रति किलो) इतका नोंदवला गेलाय.

दरातील या मोठ्या घसरणीमुळे आगामी काही दिवसांतही बाजारात तेजी राहण्याची शक्यता व्यापाऱ्यांकडून व्यक्त केली जातेय. यासोबत लग्नसराईच्या तोंडावर खरेदीदारांसाठी ही बातमी खुप आनंददायी ठरतेय. कारण या काळात सोनं-चांदी खरेदीचे प्रमाण हे खुप वाढते.