पुणेकरांनो रात्री घराबाहेर पडताना सावधान! वानवडीत तिघांनी रिक्षा अडवली, प्रवाशाला खाली उतरवलं अन् कांड

मिळालेल्या माहितीनुसार, ७५ वर्षीय तक्रारदार ज्येष्ठ नागरिक शुक्रवारी रात्री साडेदहाच्या सुमारास रिक्षाने वानवडी परिसरातून जात होते. रिक्षा मथुरावाला मैदानाजवळ पोहोचली असता, तिथे असलेल्या अंधाराचा फायदा घेऊन एका दुचाकीवरून आलेल्या तीन तरुणांनी रिक्षा अडवली. आरोपींनी रिक्षात बसलेल्या ज्येष्ठाला बाहेर ओढले आणि त्यांना जबरदस्तीने धक्काबुक्की करत त्यांच्याकडील ६० हजार रुपयांची रोख रक्कम हिसकावून घेतली.

वानवडी पोलिसांनी याप्रकरणी अज्ञात तीन चोरट्यांविरुद्ध गुन्हा दाखल केला आहे. पोलीस उपनिरीक्षक बाळासाहेब वाकडे या गुन्ह्याचा पुढील तपास करत आहेत. परिसरातील सीसीटीव्ही फुटेज तपासण्याचे काम सुरू असून, रात्रीच्या वेळी गस्त वाढवण्याची मागणी स्थानिक नागरिकांकडून केली जात आहे. एकट्या प्रवाशांना, विशेषतः वृद्धांना लक्ष्य करणाऱ्या या टोळीचा शोध घेणे पोलिसांसमोर मोठे आव्हान आहे.