अष्टविनायक महामार्गावर भीषण अपघात; मदतीसाठी दरवाजा उघडताच समोर आलं भलतंच कांड, कारमध्ये नेमकं काय होतं?

नेमकी घटना काय?

मलठण (ता. शिरूर) येथे दुपारी साडेबाराच्या सुमारास एका इनोव्हा (MH 12 VB 500) आणि आय-२० (MH 12 GF 1606) कारची जोरदार धडक झाली. धडक इतकी भीषण होती की दोन्ही गाड्यांचा चक्काचूर झाला. इनोव्हामधील ५ प्रवासी किरकोळ जखमी झाले. मात्र, खरा थरार आय-२० कारपाशी सुरू होता.

मद्यधुंद चालक आणि 'ती' १५ कॅन!

advertisement

अपघातानंतर आय-२० कारचा चालक अनिल चंदया चौहाण (रा. लोणी काळभोर) हा मद्यधुंद अवस्थेत पळून जाण्याचा प्रयत्न करत होता. मात्र, सतर्क ग्रामस्थांनी त्याला पकडून पोलिसांच्या ताब्यात दिले. जेव्हा पोलिसांनी कारची तपासणी केली, तेव्हा आतमध्ये ३० लिटर क्षमतेचे तब्बल १५ कॅन आढळले. या कॅनमध्ये ४५० लिटर तयार हातभट्टीची दारू भरलेली होती.

राज्यात निवडणुकीचे वारे वाहत असताना, भरदिवसा महामार्गावरून इतक्या मोठ्या प्रमाणात दारूची वाहतूक होत असल्याने खळबळ उडाली आहे. पोलीस डोळे झाकून आहेत का? असा संतप्त सवाल नागरिक विचारत आहेत. आरोपी अनिल चौहाण हा पोलिसांच्या प्रश्नांना उडवाउडवीची उत्तरे देत असल्याने घटनास्थळी जमावाने त्याला चांगलाच चोप दिल्याचीही चर्चा आहे. पोलिसांनी सर्व मुद्देमाल आणि वाहन जप्त केले असून शिरूर पोलीस पुढील तपास करत आहेत.