TRENDING:
दक्षिण आफ्रिकेविरुद्धच्या लाजिरवाण्या पराभवानंतर, गंभीरची सामन्यानंतरची पत्रकार परिषद वादाचा केंद्रबिंदू बनली आहे. कोलकात्यामध्ये झालेल्या पहिल्या टेस्टनंतर गौतम गंभीरने खेळाडूंबद्दल केलेल्या वक्तव्यावरून बीसीसीआय नाराज झाली आहे. हिंदुस्तान टाईम्सच्या वृत्तानुसार कोलकाता टेस्टनंतर गौतम गंभीरने केलेलं वक्तव्य आगीत तेल टाकण्याचं काम करणारं होतं, असं बीसीसीआयला वाटत आहे. बीसीसीआयला गौतम गंभीरचं हे जाहीर विधान आणि त्याचा स्वर आवडलेला नाही.
advertisement
काय म्हणाला होता गंभीर?
कोलकाता टेस्टमधील पराभवानंतर गंभीरने मी स्पिन बॉलिंगला मदत करणारी खेळपट्टी मागितली होती, पण भारतीय खेळाडूंना चांगली बॅटिंग करता आली नाही. खेळाडू टिकून खेळले असते, तर आम्ही हा सामना जिंकलो असतो, असं गंभीर जाहीर पत्रकार परिषदेत म्हणाला होता. गंभीरच्या या वक्तव्यावरच बीसीसीआय नाराज झाल्याचं वृत्त आहे. गंभीर टीममधल्या त्याच्या खेळाडूंबाबत जाहीरपणे असं कसं बोलू शकतो? असा सवाल बीसीसीआयच्या अधिकाऱ्याने बैठकीत विचारल्याचं सांगण्यात येत आहे.
गौतम गंभीर प्रशिक्षक झाल्यापासून टीम इंडियाची घरच्या मैदानातील टेस्ट क्रिकेटमधील कामगिरी निराशाजनक झाली आहे. मागच्या वर्षभरात खेळलेल्या 7 सामन्यांपैकी भारताने फक्त 2 मॅच जिंकल्या तर 5 सामन्यात टीमला पराभव पत्करावा लागला. गौतम गंभीर टीममध्ये स्पेशलिस्ट बॅटर आणि स्पेशलिस्ट बॉलरऐवजी ऑलराऊंडरना घेऊन खेळत असल्यामुळे अनेक माजी क्रिकेटपटूंनी त्याच्यावर टीकाही केली आहे. टेस्ट क्रिकेटमधील खराब कामगिरीमुळे गौतम गंभीरवरचा दबाव वाढत आहे, पण बीसीसीआय गंभीरला पदावरून हटवण्यास सध्या तरी उत्सुक नाही. भारताने यावर्षी चॅम्पियन्स ट्रॉफी आणि आशिया कप जिंकला आहे, त्यामुळे बीसीसीआयचा गंभीरवरचा विश्वास अजूनही कायम आहे.