अपचन, केस गळती अन् त्वचा विकारांवर रामबाण, हिवाळ्यात रोज आवळा खाण्याचे जबरदस्त फायदे

आयुर्वेदात आवळा हे फळ अत्यंत आरोग्यदायी मानलं जातं. हिवाळ्यात आवळा खाण्याचे आरोग्यासाठी जबरदस्त फायदे आहेत. त्यामुळे रोज एक आवळा खाल्ल्यास अनेक आजारांपासून बचाव होऊ शकतो.

आंबट-तुरट चवीचा आवळा शरीरासाठी अनेक पोषक तत्त्वांचा खजिना मानला जातो. याबाबतच छत्रपती संभाजीनगर येथील आहारतज्ज्ञ मंजू मंठाळकर यांनी माहिती दिलीये.

हिवाळा म्हटलं की बाजारात मोठ्या प्रमाणात विक्रीसाठी आवळे येत असतात. आवळा हा आयुर्वेदात पोषक तत्त्वांचा खजिना मानला जातो. हिवाळ्यात शरीराला क जीवनसत्त्वाची आवश्यकता असते.

आवळा हा क जीवनसत्वाचा उत्तम स्त्रोत मानला जातो. आवळा खाल्ल्याने आपली त्वचा निरोगी राहते. तसेच हिवाळ्यात होणारे त्वचिवकार देखील आवळ्याच्या आहारातील समावेशामुळे टाळता येतात, असे आहारतज्ज्ञ सांगतात.

हिवाळ्यात थंडीमुळे शरीराची रोगप्रतिकारक शक्ती कमी होण्याचा धोका असतो. आवळा खल्ल्याने शरीराची रोग प्रतिकार शक्ती वाढते. सर्दी, ताप यासारख्या किरकोळ आजारांपासून आवळा खाल्ल्याने रक्षण होते. शिवाय शरीरावरील जखम भरण्यास देखील मदत होते.

आवळ्यात फायबरचे प्रमाण चांगले असते. त्यामुळे पचनक्रिया सुधारण्यास मदत होते. बद्धकोष्ठता, अपचन या सारख्या समस्यांवर आवळा उत्तम इलाज आहे. तसेच आवळ्यामुळे पोट साफ राहतं. त्यामुळे त्वचेवरील पुरळ आणि केस गळतीसारख्या समस्याही थांबतता. केस, त्वचा विकारांवर देखील आवळा लाभदायी असून वजन कमी करण्यासही उपयुक्त ठरतो.

आवळा हा विविध प्रकारे सेवन करता येतो. तुम्ही कच्चा आवळा खाऊ शकता किंवा आवळ्याचा मुरांबा, लोणचं, ज्यूस बनवून देखील सेवन करू शकता. तसेच आवळा पावडर बनवूनही ती आहारात वापरू शकता. पण रोज आवळा खाणे आरोग्यासाठी लाभदायी असून कच्चा आवळा खाणं अधिक उपयुक्त असल्याचं मंजू मठाळकर सांगतात. (अपूर्वा तळणीकर, प्रतिनिधी)