वय अवघं 7 आणि सुवर्णपदकांचं शतक, पुण्यातल्या लेकीची प्रत्येकाला अभिमान वाटेल अशी कामगिरी

पुणे : अगदी बालपणापासूनच योग्य मार्गदर्शन मिळाल्यास चिमुकली मुलंही आंतरराष्ट्रीय पातळीपर्यंत झेप घेऊ शकतात. पुण्यातील 7 वर्षांच्या चिमुकलीनं हेच दाखवून दिलंय. साडेतीन वर्षांची असताना स्केटिंग सुरू करणाऱ्या मनस्वी पिंपरे हिनं 3 वर्षांत सुवर्णपदकांचं शेतक पूर्ण केलंय. विशेष म्हणजे तिच्या कामगिरीची दखल अगदी गिनीज बुक ऑफ वर्ल्ड रेकॉर्डनेही घेतली असून काही जागतिक विक्रमही तिने आपल्या नावे केले आहेत. तिच्या कामगिरीचं सर्वत्र कौतुक होत आहे. पण एका सामान्य कुटुंबातील चिमुकलीच्या यशाचं रहस्य नेमकं काय? हेच आपण लोकल18 च्या माध्यमातून जाणून घेणार आहोत.

पुण्यातील कोंढावा बुद्रुक भागात राहणारी मनस्वी पिंपरे ही सात वर्षाची स्केटर आहे. तिचे वडील विशाल पिंपरे ई सेवा केंद्र चालवतात. आई-वडिलांच्या लग्नाला 12 वर्षे झाल्यानंतर तिचा जन्म झाला. लेकीनं वेगलं काहीतरी करावं अशी वडिलांची इच्छा होती. त्यामुळे साडेतीन वर्षांची असतानाच त्यांनी मनस्वीला स्केटिंगचं प्रशिक्षण द्यायला सुरुवात केली. 9 ऑक्टोबर 2021 रोजी तिने पहिल्या राज्यस्तरीय स्केटिंग स्पर्धेत कांस्य पदक जिंकून आपली कारकीर्द सुरू केली. अवघ्या 3 वर्षांत तिने 1 आंतरराष्ट्रीय, 11 राष्ट्रीय, 12 राज्यस्तरीय आणि 65 जिल्हास्तरीय स्केटिंग स्पर्धांमध्ये सहभागी होऊन एकूण 100 सुवर्ण, 14 रजत आणि 12 कांस्य पदके मिळवली आहेत.