TRENDING:
एक काळ असा होता, जेव्हा ड्रीमगर्ल हेमामालिनीला पाहण्यासाठी लोक चित्रपटगृहांबाहेर रांगा लावायचे. शोले, सीता और गीता यांसारख्या सुपरहीट चित्रपटांमुळे त्यांच्या करिअरला नव्या उंचीवर नेऊन ठेवलं. मात्र सुरुवातीला या क्षेत्रात दाखल झाल्यावर हेमामालिनी यांना त्यांच्या शिडशिडीत अंगकाठीमुळे चित्रपटात काम मिळेनासं झालं होतं. तरीही त्या डगमगल्या नाहीत.
मनोरंजन क्षेत्रांतल्या रिपोर्ट्सनुसार, करिअरच्या सुरुवातीला हेमामालिनी खूपच बारीक होत्या. त्यामुळे ऑडिशनसाठी गेल्यावर त्यांना नकार मिळायचा. बरेच नकार पचवल्यानंतर अखेर त्यांना एक तमिळ चित्रपट मिळला. तो चित्रपट स्वीकारल्यानंतर दिग्दर्शकानं त्यांचं नाव बदलून सुजाता असं ठेवलं होतं. मात्र शूटिंग सुरू झाल्यावर 4 दिवसांत त्यांनी हेमामालिनी यांना काढून टाकलं.
advertisement
संपत्तीच्या बाबतीत नवऱ्यालाही टक्कर देते ड्रीम गर्ल; अभिनयासोबत 'या' क्षेत्रातून करतात कमाई
असं म्हणतात, की हेमामालिनी यांनी अनेक नकारांचा सामना केला, पण तरीही त्यांनी हार मानली नाही. त्यांच्या लूकवर काम करण्यासोबतच त्यांनी शास्त्रीय नृत्यही शिकायला सुरुवात केली. शास्त्रीय नृत्यात पारंगत झाल्यानंतर त्यांनी आपल्या चित्रपट कारकिर्दीला सुरुवात केली. सुरुवातीला हेमा यांनी अनेक छोट्या भूमिका केल्या. मग एके दिवशी त्यांना ‘सपनों के सौदागर’ हा चित्रपट मिळाला. या चित्रपटामुळे त्यांचं नशीब बदललं. रिपोर्ट्सनुसार, हेमामालिनी यांनी 100 हून अधिक चित्रपटांमध्ये काम केलं आहे.
हेमा यांनी अभिनेते धर्मेंद्र यांच्याशी लग्न केलं. चित्रपटांबरोबरच त्यांनी त्यांची नृत्यसाधनाही सुरू ठेवली. हेमामालिनी या तमिळ कुटुंबातल्या असून काही तमिळ चित्रपटात त्यांनी काम केलं आहे. त्यानंतर हिंदी चित्रपटसृष्टीकडे त्यांनी वाटचाल केली. त्यांना आजवर अनेक फिल्मफेअर पुरस्कार मिळाले असून पद्मश्री पुरस्कारही मिळाला आहे. सत्तर आणि ऐंशीच्या दशकात त्यांचे अनेक चित्रपट सुपरहीट ठरले. धर्मेंद्र आणि राजेश खन्ना यांच्याबरोबर त्यांनी सहकलाकार म्हणून सर्वाधिक चित्रपट केले आहेत. देशभरात त्यांची लोकप्रियता आजही दिसून येते. सध्या त्या भाजपच्या खासदार आहेत त्याचबरोबर टीव्ही जाहिरातींमध्येही दिसतात. चाहत्यांच्या मनात या ड्रीमगर्लनं अढळ स्थान मिळवलं आहे.