Homemade Conditioner : केस आधीच रुक्ष आहेत, केमिकल्स वापरण्याची इच्छा नाही? घरीच बनवा 'हे' हर्बल हेअर कंडीशनर!

प्रत्येकजण आठवड्यातून एकदा किंवा दोनदा केस शॅम्पू करतो. कठोर, रसायनयुक्त शॅम्पू बहुतेकदा केसांना अत्यंत खडबडीत, कोरडे आणि गुंतलेले ठेवतात. त्यामुळे केसांना कंडिशनिंग आवश्यक असते. हेअर केअर रुटीनमध्ये कंडिशनिंग हा एक महत्त्वाचा घटक आहे. कंडिशनिंग केसांचे आरोग्य आणि देखावा सुधारते, ज्यामुळे ते सांभाळणे सोपे होते. शॅम्पू केल्याने तुमच्या केसांमधून आणि टाळूमधून घाण, तेल आणि कोंडा काढून टाकला जातो, तर कंडिशनरचे काम ओलावा टिकवून ठेवणे आणि केसांना पोषण देणे आहे.

advertisement

नैसर्गिक कंडिशनरमध्ये कोरफड असते. कोरफड कोरडे केस, कोंडा आणि ठिसूळपणा यासारख्या समस्या टाळण्यास मदत करते. तसेच कोरफड केसांना मॉइश्चरायझ करते, मजबूत आणि चमकदार ठेवते. त्याचसोबत टाळूलाही आराम देते. कोरफडीमुळे केसांतीतलं जास्तीचे तेल नियंत्रित होते आणि केसांची योग्यरीत्या वाढ होते.

असं बनवा होममेड कंडिशनर

होममेड कंडिशनर बनवण्यासाठी तुम्हाला 2 चमचे कोरफडीचा गर, 1 चमचा नारळ तेल, 1/2 चमचा मध आणि कोमट पाणी लागेल. प्रथम कोरफड तोडा आणि उभी करून त्याचा पिवळा द्रव किंवा रस तळापासून निथळू द्या. हा रस वेगळा केल्यानंतर कोरफडीचा गर व्यवस्थित फेटून घ्या. आता त्यामध्ये नारळ तेल आणि मध मिसळा. सोबत थोडे कोमट पाणी घाला आणि सर्वकाही नीट मिसळा. एकाच वेळी जास्त प्रमाणात हे बनवून ठेऊ नका. प्रत्येक वेळी ताजा बनवा.

होममेड कंडिशनरचे फायदे

शॅम्पू केल्यानंतर हे होममेड कंडिशनर लावा आणि थोड्या वेळाने धुवा. या होममेड कंडिशनरमुळे केस मजबूत होतात, तसेच ते मऊ आणि गुळगुळीत होतात. केसांना नैसर्गिक चमक येते. आणि केसांमधील गुंता सहज निघतो.

Disclaimer : या बातमीत दिलेली माहिती आणि आरोग्याशी संबंधित सल्ला तज्ञांशी झालेल्या संभाषणांवर आधारित आहे. ही सामान्य माहिती आहे, वैयक्तिक सल्ला नाही. म्हणून, डॉक्टरांचा सल्ला घेतल्यानंतरच काहीही वापरा. त्याच्या वापरामुळे होणाऱ्या कोणत्याही नुकसानासाठी न्यूज-18 जबाबदार राहणार नाही.