TRENDING:
रोहित पवार यांनी आक्रमक भूमिका घेतली आहे. अजित पवारांच्या अपघाताबाबत आता ते आज बारामती शहर पोलीस ठाण्यात फिर्याद दाखल करणार आहेत. त्यांनी बुधवारी मुंबईतील मरीन लाईन पोलीस ठाण्यातही याबाबत तक्रार दाखल करण्याचा प्रयत्न केला होता. त्यामुळे अजितदादांच्या अपघाताचं हे प्रकरण आता चांगलंच तापताना दिसत आहे. शिवाय अपघाताच्या दुसऱ्या दिवशी बारामती पोलीस ठाण्यात ब्लॅक बॉक्स सुरक्षित असल्याची नोंद करण्यात आली होती, अशी माहिती समोर आली आहे. त्यामुळे तपास यंत्रणांकडून ब्लॅक बॉक्सबद्दल माहिती लपवली जात आहे का? असा सवाल उपस्थित होतं आहे.
advertisement
अजित पवारांच्या अपघाताबाबत गूढ वाढत जात असताना आता रोहित पवारांनी अजित पवारांचा एक जुना व्हिडीओ शेअर केला आहे. त्यांनी एक्स अकाऊंटवर केलेल्या पोस्टमध्ये हा व्हिडीओ शेअर केला आहे. "अजितदादांचं हे मनमोकळं खळखळून हास्य पुन्हा कधीच दिसणार नाही, या विचाराने आमच्यासारख्या लाखो जणांना आजही अश्रू आवरता येत नाहीत. म्हणूनच या अश्रूंची किंमत वसूल केल्याशिवाय महाराष्ट्र थांबणार नाही...!" असं कॅप्शन रोहित पवारांनी या व्हिडीओला दिलं आहे. रोहित पवारांनी शेअर केलेल्या या जुन्या व्हिडीओत अजित पवार खळखळून निरागसपणे हसताना दिसत आहेत.
अजित पवारांचा अपघात कसा झाला?
२८ जानेवारी रोजी सकाळी ८ वाजून ४६ मिनिटांनी अजित पवारांच्या विमानाला अपघात झाला. त्यादिवशी अजित पवार मुंबईहून बारामतीच्या दिशेनं येत होते. जिल्हा परिषद निवडणुकीच्या पार्श्वभूमीवर अजित पवारांच्या चार सभा आयोजित करण्यात आल्या होत्या. याच सभांना संबोधित करण्यासाठी ते विमानाने बारामतीच्या दिशेनं आले. मात्र सकाळी धुक्यांमुळे दृश्यमानता कमी असल्याने त्यांच्या विमानाला लँडिंग करता आलं नाही. त्यामुळे विमानाने पहिल्यांदा 'गो अराऊंड' घेतला. यानंतर साधारण तीन मिनिटांनी पुन्हा लँडींगचा दुसरा प्रयत्न करण्यात आला. पण हा प्रयत्न फसला आणि विमान धावपट्टीजवळ कोसळलं. यात अजित पवारांसह एकूण पाच जणांचा दुर्दैवी अंत झाला.