बॅनरवरून अजितदादांचा फोटो हटवला, मिटकरी संतापले, तटकरेंना उघड इशारा देत म्हणाले...

रायगडमधील राष्ट्रवादी काँग्रेसच्या एका कार्यक्रमाच्या बॅनरवरून अजित पवार आणि सुनेत्रा पवार यांचे फोटो गायब झाल्याचे समोर आले आहे. विलिनीकरण आणि पक्ष ताब्यात घेण्याच्या कथित मुद्द्यावरून आधीच सुनील तटकरे हे राष्ट्रवादीच्या काही पदाधिकाऱ्यांच्या निशाण्यावर होते. त्यात आता बॅनरवर अजित पवार आणि सुनेत्रा पवार यांचे फोटो नसल्याच्या मुद्द्यावरून तटकरे यांच्यावर जोरदार टीका होत आहे.

advertisement

अमोल मिटकरी काय म्हणाले?

“ज्यांच्या नेतृत्वावर कार्यकर्त्यांचा विश्वास आहे, त्यांचाच फोटो हटवला जातोय, हे राष्ट्रवादीचा सर्वसामान्य कार्यकर्ता कधीही सहन करणार नाही, असा इशारा देत राष्ट्रवादीच्या दैवतांना डावलून स्वत: देव बनण्याचा कुणीही प्रयत्न करू नये. महाराष्ट्र हे सहन करणार नाही, अशा शब्दात अमोल मिटकरी यांनी आपला संताप व्यक्त केला आहे. या पोस्टमध्ये त्यांनी तटकरे यांचे नाव घेण्याचे टाळले असले तरी त्यांचा रोख तटकरे यांच्याकडेच असल्याचे स्पष्ट होते.

नेमका प्रकार काय?

मंत्री आदिती तटकरे यांच्या मतदारसंघातील इंदापुर येथे माणगांव तालुक्यातील नवनिर्वाचित जिल्हा परिषद आणि पंचायत समिती सदस्यांचा सत्कार आयोजित करण्यात आला होता. यावेळी व्यासपीठावरील बॅनरवर खासदार सुनील तटकरे, मंत्री आदिती तटकरे, माजी आमदार अनिकेत तटकरे यांच्यासह स्थानिक नेत्यांचे फोटो लावण्यात आले. मात्र या बॅनरवर दिवंगत नेते अजित पवार, उपमुख्यमंत्री सुनेत्रा पवार यांच्यासह पक्षश्रेष्ठींचे फोटो लावण्यात आले नव्हते. रायगडमध्ये राष्ट्रवादीच्या बॅनरवरून पक्षश्रेष्ठी बेपत्ता होत असल्याने राजकीय वर्तुळात उलटसुलट चर्चा सुरू झाल्या आहेत.

अजितदादांचा पक्ष ताब्यात घेण्याचे तटकरेंचे प्रयत्न उघड झाले- विकास लवांडे

अजित दादांचा राष्ट्रवादी पक्ष ताब्यात घेण्याचे आधीपासूनचेच मनसुबे लपवून राहिलेले नाहीत. त्याची सुरुवात रायगड पासून झाली आहे. आदरणीय अजित दादांचा आणि उपमुख्यमंत्री सुनेत्रा वहिनींचा पक्षाच्या अधिकृत कार्यक्रमात बॅनरवर नाव किंवा फोटो सुद्धा नाही. याला कृतघ्नता म्हणतात, अशा शब्दात राष्ट्रवादी शरदचंद्र पवार पक्षाचे प्रवक्ते विकास लवांडे यांनी सुनील तटकरे यांच्यावर टीका केली.

अजितदादांनी यांना पक्षाच्या प्रदेशाध्यक्ष पदावर अनेक वर्षे ठेवल्यामुळे यांची राज्य पातळीवर प्रतिष्ठा वाढली. यांनी पक्षांतर्गत ओबीसी मराठा असा जातीयवाद सुद्धा वाढवलेला आहे. जे अजितदादांना पटत नव्हते. सुनील तटकरे तुमच्यात हिम्मत असेल तर स्वतःचा पक्ष प्रफुल पटेल यांना सोबत घेऊन काढावा. किंवा भाजपमध्ये जाण्यासाठी तुम्ही आधीपासूनच तयार आहात तर तुमची चार चौकडी घेऊन तुम्ही जावे. तुमच्या कृतघ्नतेचा तीव्र निषेध, असे लवांडे म्हणाले.