TRENDING:
मिळालेल्या माहितीनुसार, गणेश काळे हा एका फायनान्स कंपनीत नोकरीला होता. लातूर जिल्ह्याचा तो प्रमुख होता. त्याच्यावर ५७ कोटींचं कर्ज होतं. फ्लॅट विकत घेण्यासाठी त्याने हे कर्ज काढलं होतं. हेच कर्ज फेडण्यासाठी त्याने लिफ्ट मागणाऱ्या एका ५० वर्षीय व्यक्तीला जीवंत जाळून मारलं आहे. यासाठी त्याने तीन वर्षे आधीच हे प्लॅनिंग केल्याचं समोर आलं आहे.
advertisement
तीन वर्षापूर्वी त्याने एक कोटींचा विमा काढला होता. हीच रक्कम मिळवण्यासाठी त्याने स्वत:च्या मृत्यूचा बनाव रचला. पण त्याचा हा बनाव फार काळ टिकला नाही. या घटनेनंतर तो एका मैत्रिणीच्या संपर्कात होता. यावरून पोलिसांनी त्याचा माग काढून त्याला अटक केली आहे. जळीत कांडानंतर गणेशने त्याचे दोन सीम बंद केले होते. तिसऱ्या सीमवरून आपल्या मैत्रिणीशी चॅटिंग केली. अवघ्या २४ तासांत पोलिसांच्या तो गळाला लागला.
नेमकं प्रकरण काय?
रविवारी रात्री उशिरा औसा तालुक्यातील वानवडा पाटी ते वानवडा रोडवर एका कारला आग लागल्याचा कॉल डायल ११२ वर आला होता. तातडीने घटनेचे गांभीर्य ओळखून गस्तीवरील पोलिसांना याची माहिती देण्यात आली. पोलिसांनीही घटनास्थळी धाव घेत घटनेचा पंचनामा केला. कारमध्ये आढळून आलेल्या हातातील कड्यावरून आणि कारच्या क्रमांकावरून गणेश चव्हाणच्या कुटुंबीयांशी संपर्क करण्यात आला. कुटुंबीयांनी यावरून कारमध्ये जळालेला सांगाडा हा गणेश चव्हाणचाच असल्याचे सांगितले. पोलिसांनी तपासाला गती दिली.
कुटुंबीयांच्या सांगण्यावरून गणेश चव्हाण याच्याकडे असलेले दोन मोबाइल समोर आले. हे दोन्ही क्रमांक बंद आढळून आले. दरम्यान, त्याने अलीकडे सर्वाधिक कॉल कोणाला केले? याचा पोलिसांनी शोध घेतला. गणेश चव्हाण एका महिलेशी बोलत असल्याचे समोर आले. यातूनच तो तिच्याशी चॅटिंग करत असल्याचे पोलिसांना समजले. मग गणेश चव्हाण तर कारमध्ये जळाला असेल तर चॅटिंग कोण करत आहे? या प्रश्नाने पोलिसांना भंडावून सोडले. मग पोलिसांनी त्याच्या तिसऱ्या मोबाइल क्रमांकाच्या लोकेशनचा शोध घेतला. तो रात्री कोल्हापूरमध्ये असल्याचे समोर आले. पुन्हा काही तासांनी तो तळकोकणात बसने सिंधुदुर्ग जिल्ह्यात गेल्याची माहिती पोलिसांना मिळाली. पोलिसांनी पाठलाग करत त्याला विजयदुर्ग येथे अटक केली. त्याला विश्वासात घेत विचारपूस केली असता, गुन्ह्याचे बिंग फुटले.