TRENDING:
मिळालेल्या माहितीनुसार, एका अल्पवयीन मुलीचे त्याच परिसरात राहणाऱ्या एका अल्पवयीन मुलासोबत प्रेमप्रकरण सुरू होते. दोघेही एकमेकांच्या संपर्कात होते. मात्र, १२ फेब्रुवारीच्या रात्री या मुलाने मुलीला फोन केला. योगायोगाने तो फोन मुलीच्या वडिलांनी उचलला आणि प्रेमप्रकरणाचे बिंग फुटलं. हा प्रकार समजल्यानंतर मुलीच्या वडिलांनी हे प्रकरण सामोपचाराने मिटवण्यासाठी आणि मुलाला समज देण्यासाठी त्याला आपल्या घरी बोलावलं.
advertisement
मुलीच्या वडिलांनी केवळ मुलाला घरी बोलावलं होतं, पण तो मुलगा घरी एकटा आला नाही. त्याने आपल्यासोबत आपला भाऊ आणि एका मित्राला बरोबर घेतलं. सुरुवातीला बोलणं सुरू असताना वादावादी वाढली. रागाच्या भरात असलेल्या या अल्पवयीन प्रेमवीराने आपल्याकडे असलेला चाकू काढला आणि मुलीच्या वडिलांवर आणि काकांवर सपासप वार केले. या हल्ल्यात मुलीचे वडील आणि काका गंभीर जखमी झाले आहेत.
दोन्ही बाजूचे लोक जखमी
हा वाद इतका विकोपाला गेला की दोन्ही बाजूंनी हाणामारी सुरू झाली. या झटापटीत तो अल्पवयीन मुलगादेखील जखमी झाला. जखमी झालेल्या वडिलांना आणि काकांना तातडीने रुग्णालयात हलवण्यात आले असून, त्यांच्यावर उपचार सुरू आहेत. आरोपी मुलगादेखील जखमी झाला असून त्याच्यावर देखील उपचार सुरू आहेत.
पोलिसांत गुन्हा दाखल
या घटनेची माहिती मिळताच चांदूर रेल्वे पोलिसांनी तातडीनं घटनास्थळी धाव घेतली. मुलीच्या वडिलांनी दिलेल्या तक्रारीनुसार, पोलिसांनी त्या अल्पवयीन मुलासह त्याच्या भावाविरुद्ध विविध कलमान्वये गुन्हा दाखल केला आहे. घटनेचा पुढील तपास पोलीस करत आहेत.