संभाजीनगर हादरलं! मध्यरात्री घरात घुसून विवाहितेवर अत्याचार, मारहाणीत पतीचा मृत्यू

नेमकी घटना काय?

मिळालेल्या माहितीनुसार, शुक्रवारी रात्रीच्या सुमारास फिर्यादी महिला आपल्या घरी एकटीच होती. याच दरम्यान गावातील दोन नराधम घरामध्ये घुसले. त्यांनी महिलेचा विनयभंग करत तिच्याशी जबरदस्तीने लगट करण्याचा प्रयत्न केला. यावेळी पीडित महिला आरडाओरडा करत असतानाच तिचे पती तिथे पोहोचले.

आपल्या पत्नीवर होत असलेला अत्याचार पाहून पतीने तातडीने पत्नीला आरोपींच्या तावडीतून सोडवण्याचा प्रयत्न केला. या झटापटीदरम्यान, आरोपींनी पतीलाही मारहाण केली. या घटनेमुळे आणि झालेल्या धक्काबुक्कीमुळे महिलेच्या पतीला प्रचंड मानसिक धक्का बसला आणि त्यातच त्यांना हृदयविकाराचा झटका आला. या झटापटीतच त्यांचा दुर्दैवी मृत्यू झाला.

advertisement

घटनेनंतर परिसरात एकच खळबळ उडाली. पीडित महिलेने हिंमत एकवटत सिल्लोड ग्रामीण पोलीस ठाण्यात धाव घेतली आणि घडलेल्या प्रकाराची सविस्तर माहिती दिली. महिलेच्या तक्रारीवरून पोलिसांनी दोन्ही आरोपींविरोधात विनयभंग आणि मारहाण केल्याप्रकरणी गुन्हा दाखल केला आहे. सिल्लोड ग्रामीण पोलीस या प्रकरणाचा अधिक तपास करत आहेत.