Nagpur Crime : बोर्डाच्या पेपरला जात होती अन् वाटेतच मृत्यूने गाठलं, वडिलांसमोर 12 वीच्या विद्यार्थीनीने तडफडून सोडला जीव!

सकाळी 10:30 च्या सुमारास...

उमरेड पोलीस स्टेशनच्या हद्दीतील एमआयडीसी पुलाजवळ हा अपघात सकाळी 10:30 च्या सुमारास झाला. विरुद्ध दिशेने येणाऱ्या एका भरधाव ट्रकने दुचाकीला समोरून जोरदार धडक दिली. ही धडक इतकी भीषण होती की दुचाकीचा चक्काचूर झाला. यामध्ये सुभाष भिवणकर आणि तन्वी यांचा घटनास्थळीच अंत झाला, तर वंशिका गंभीर जखमी झाली असून तिच्यावर हॉस्पिटलमध्ये उपचार सुरू आहेत.

advertisement

ट्रकच्या केबिनला लावली आग

या भीषण अपघातानंतर घटनास्थळी बघ्यांची मोठी गर्दी जमली आणि परिसरात तणाव निर्माण झाला. संतप्त झालेल्या नागरिकांनी ट्रक चालक प्रफुल दशरथ भोयर याला पकडून बेदम मारहाण केली. एवढेच नाही तर संतापलेल्या जमावाने ट्रकच्या केबिनला आग लावून आपला रोष व्यक्त केला. एका तरुण विद्यार्थिनीचा परीक्षेला जातानाच असा अंत झाल्याने संपूर्ण मोहपा गावात शोककळा पसरली आहे.

पोलीस गाड्यांवर दगडफेक

परिस्थिती हाताबाहेर जात असल्याचे पाहून उमरेड पोलिसांनी तातडीने घटनास्थळी धाव घेतली. पोलिसांनी जमावाच्या तावडीतून ट्रक चालकाची सुटका करून त्याला ताब्यात घेतले. मात्र, यावेळी संतप्त जमावाने पोलीस गाड्यांवर दगडफेक केली, ज्यामुळे सरकारी वाहनांचे नुकसान झाले. पोलिसांनी कसाबसा जमावाला शांत करून परिस्थिती नियंत्रणात आणली आणि मृतदेह शवविच्छेदनासाठी पाठवले.

ट्रक चालकाविरुद्ध गुन्हा दाखल

दरम्यान, बारावीच्या बोर्ड परीक्षेचा उत्साह असतानाच घडलेल्या या घटनेमुळे सर्वत्र हळहळ व्यक्त होत आहे. पोलिसांनी या प्रकरणी ट्रक चालकाविरुद्ध गुन्हा दाखल केला असून पुढील तपास सुरू केला आहे. आपल्या पोटच्या मुलीला करिअरच्या महत्त्वाच्या वळणावर साथ देण्यासाठी निघालेल्या वडिलांचा आणि मुलीचा असा मृत्यू होणे हे समाजासाठी चटका लावणारे ठरले आहे.