व्हिडीओ बाहेर आले खरे पण अशोक खरातचा खरा धंदा वेगळाच होता, पोलीस तपासात धक्कादायक माहिती समोर

दहावी नापास असलेला भोंदूबाबा अशोक खरातने शेकडो कोटींची मालमत्ता कशी जमवली, याचा शोध घेत असताना पोलिसांना चौकशीत काही धक्कादायक माहिती मिळाल्याचे पोलीस सूत्रांनी सांगितले. अशोक खरात याने जवळच्या लोकांचे आधार कार्ड आणि पॅन कार्ड घेऊन अनेक कारनामे केले आहेत. नाशिक आणि अहिल्यानगर जिल्ह्यातील दोन पतसंस्थेत अशोक खरात याने दुसऱ्यांच्या आधार कार्ड आणि पॅनकार्डचा गैरफायदा घेऊन जवळपास १०० हून अधिक खाती उघडून त्याद्वारे शेकडो कोटींचे व्यवहार केले आहे.

advertisement

अशोक खरातचा खरा धंदा वेगळाच होता, पोलीस तपासात धक्कादायक माहिती समोर

विशेष पोलीस पथकाच्या चौकशीत, नाशिकमधील जगदंब पतसंस्था आणि अहिल्यानगर जिल्ह्यातील समता पतसंस्थेत अशोक खरात हा जवळपास १०० वेगवेगळ्या खातेदारांना नॉमिनी (वारसदार) आहे. विशेष म्हणजे ही खाती एकाच दिवशी उघडण्यात आल्याचे समोर आले आहे. शुक्रवारी पोलिसांनी पतसंस्थेतील खातेदारांना चौकशीसाठी बोलवले होते. त्यावेळी आमची कागदपत्रे वापरून त्याने ही खाती उघडली असावीत, असे सात खातेदारांनी सांगितले. कागदपत्रे जरी खरी असली तरी स्वाक्षरी बनावट असल्याचे संबंधित खातेदारांनी सांगितले. तसेच खात्यातील पैशांवरही आमचा कोणत्याही प्रकारचा दावा नसेल, असेही त्यांनी सांगितले.

आम्ही कोणतीही कागदपत्रे स्वतःहून दिली नाहीत. खात्यांवरील स्वाक्षरी आमची नाही. या खात्यावर आम्ही कधीही व्यवहार केलेले नाहीत. खाते उघडताना वापरलेले आधार कार्ड आणि पॅन कार्ड आमचीच आहेत. मात्र सह्या आमच्या नाहीत, असे खातेदारांनी अपर पोलीस अधीक्षक सोमनाथ वाकचौरे आणि पोलीस निरीक्षक रणजीत गलांडे यांना सांगितले. त्यावेळी अशोक खरात यानेच इतरांची कागदपत्रे वापरून ही खाती परस्पर उघडल्याचा संशय पोलिसांना आहे.

सगळे व्यवहार अशोक खरात हाताळायचा

महत्त्वाचे म्हणजे अशोक खरात स्वतःच सगळे व्यवहार हाताळत होता. इतकेच काय तर खरात याचाचा मोबाईल नंबर सगळ्या खात्यांना लिंक होता. दोन्ही पतसंस्थेचे चेअरमन आणि मॅनेजर यांची विशेष पोलीस पथकाकडून चौकशी सुरू आहे.

याचाच अर्थ अशोक खरात महिलांचे लैंगिक शोषण करत होता. पण, हे सगळे मजा म्हणून तो करीत होता. त्याचा खरा धंदा हा भक्तांकडून आलेल्या पैशांतून संपत्ती जमा करणे, भक्तांच्याच नावाने खाती उघडून त्यातून शेकडो कोटींचे आर्थिक व्यवहार करणे, कोट्यवधींचे भूखंड बळकावणे, पूजेच्या नावाखाली विदेशात फिरणे हा होता.

रुपाली चाकणकर यांच्या बहिणीचेही पतसंस्थेत खाते

जगदंबा पतसंस्था आणि समता पतसंस्थेत अशोक खरात हा शेकडो खात्यांचा नॉमिनी (वारसदार) आहे. धक्कादायक बाब म्हणजे रुपाली चाकणकरांच्या बहिणीच्या नावानेही खाते उघडण्यात आले होते. प्रतिभा गणेश चाकणकर यांच्या नावाने असलेल्या खात्यातून ४० ते ५० कोटी रुपयांचे व्यवहार झाल्याचेही पोलीस तपासात समोर आले आहे.