TRENDING:
भररस्त्यात दबा धरून हल्ला
मिळालेल्या माहितीनुसार, शरद बुट्टे पाटील हे आपल्या खासगी कामानिमित्त बाहेर गेले होते. यावेळी काही अज्ञात हल्लेखोरांनी आधीच दबा धरून बसत त्यांच्यावर अचानक हल्ला चढवला. हा हल्ला इतका भीषण होता की, यात बुट्टे पाटील यांच्या डोक्याला आणि शरीराच्या इतर भागांना गंभीर दुखापत झाली आहे. घटनेनंतर परिसरातील नागरिकांनी तत्काळ धाव घेत त्यांना वासुली फाटा येथील बालाजी हॉस्पिटलमध्ये दाखल केले. सध्या त्यांच्यावर अतिदक्षता विभागात (ICU) उपचार सुरू असून, त्यांची प्रकृती स्थिर असल्याचे डॉक्टरांकडून सांगण्यात येत आहे.
advertisement
"राजकारण लय वंगाळ धंदापाणी करा"
शरद बुट्टे पाटील यांनी काही दिवसांपूर्वीच भारतीय जनता पक्षाला सोडचिठ्ठी देऊन दिवंगत उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये जाहीर प्रवेश केला होता. याच पक्षप्रवेशाच्या कार्यक्रमात अजित पवार यांनी काय आठवणीत राहिल असं भाषण केलं होतं. "राजकारण लय वंगाळ आहे, तुम्ही धंदापाणी करा, मस्त राहा, मुलाबाळांना चांगलं शिकवा, निर्व्यसनी राहा" असं अवाहन दादांनी केलं होतं. आता याच शरद बुट्टे पाटील यांच्यावर जीवघेणा हल्ला झाला आहे. त्यांच्या पत्नी सुनिता बुट्टे यांना पक्षाने जिल्हा परिषद निवडणुकीसाठी उमेदवारी दिली आहे. या पार्श्वभूमीवर झालेला हा हल्ला राजकीय वैमनस्यातून झाला असावा, अशी शक्यता वर्तवण्यात येत आहे.
कार्यकर्त्यांचा संताप आणि पोलिसांचा तपास
या घटनेची माहिती मिळताच राष्ट्रवादी काँग्रेसच्या कार्यकर्त्यांनी बालाजी हॉस्पिटलबाहेर मोठी गर्दी केली. कार्यकर्त्यांकडून या भ्याड हल्ल्याचा तीव्र निषेध व्यक्त केला जात असून, दोषींना तत्काळ अटक करण्याची मागणी होत आहे. घटनेचे गांभीर्य ओळखून स्थानिक पोलिसांनी घटनास्थळी धाव घेत पंचनामा केला आहे. हल्लेखोर कोण होते आणि यामागे नेमका कोणाचा हात आहे, याचा तपास करण्यासाठी पोलिसांनी विशेष पथके रवाना केली आहेत.