TRENDING:
जळगावच्या धरणगाव येथे शिवसेनेचे उपनेते गुलाबराव वाघ यांच्या मुलाच्या विवाह सोहळ्याला शिवसेना ठाकरे गटाचे नेते संजय राऊत आणि मंत्री गुलाबराव पाटील यांनी उपस्थिती लावली. दोघेही पहिल्या रांगतेच स्थानापन्न झाले होते. यावेळी लग्नस्थळी दोघांमध्ये संवाद झाला.
संजय राऊतांनी गुलाबरावांच्या खांद्यावर हात ठेवला!
संजय राऊत यांनी विवाह सोहळ्यात प्रवेश केल्यानंतर मंत्री गुलाबराव पाटील यांना नमस्कार केला. त्यावर गुलाबराव पाटील यांनीही संजय राऊत यांना नमस्कार करून त्यांची विचारपूस केली.
advertisement
दोघेजण एकाच रांगेत बसलेले होते परंतु काही वेळ त्यांनी एकमेकांकडे बघण्याचे टाळले.
तथापि वधू-वरास शुभेच्छा देऊन संजय राऊत परत येत असताना मंत्री गुलाबराव पाटील वधू-वरांस शुभेच्छा देण्यासाठी जात असताना दोघांनी हस्तांदोलन केले. त्यानंतर संजय राऊत यांनी गुलाबराव पाटील यांच्या पाठीवर हात ठेवला. दोन्ही नेत्यांचे हे फोटो समाज माध्यमांवर वेगाने फिरत आहेत.
संजय राऊत-गुलाबराव पाटील यांची मैत्री
संजय राऊत आणि गुलाबराव पाटील हे दोन्ही नेते फर्डे वक्ते. आपल्या नेत्यांची कड घेऊन, भाषणे ठोकून सभा जिंकण्याचे काम गेली अनेक वर्षे दोघेही करीत आले. राऊत-गुलाबराव तसे उत्तम मित्र. परंतु पक्षात फूट पडल्यानंतर दोघांच्या मैत्रीत अंतर पडले. दोघांच्याही राजकीय वाटा वेगळ्या झाल्या. ठाकरेंसाठी दोघेही तावातावाने बोलणारे नेते एकमेकांवरच प्रहार करू लागले, दोघांमध्येच 'सामना' रंगू लागला. राऊत हे गुलाबरावांना उद्देशून गद्दार म्हणू लागले तर गुलाबराव राऊतांना एकेरी संबोधने करू लागले. परंतु जळगावातील लग्न समारंभाच्या निमित्ताने मागचे सगळे विसरून दोन्ही नेत्यांनी हस्तांदोलन करून एकमेकांची विचारपूस केली हे विशेष.