वाशिम हादरलं! राहत्या घराच्या अंगणातच अल्पवयीन मुलीवर अत्याचार, मध्यरात्रीच्या घटनेने खळबळ

वाशिम जिल्ह्याच्या कारंजा तालुक्यातील खानापूर गावात एका 14 वर्षीय अल्पवयीन मुलीवर 19 वर्षीय तरुणाने लैंगिक अत्याचार केल्याची धक्कादायक घटना 28 मार्चच्या मध्यरात्री घडली आहे. या प्रकरणी पीडित मुलीच्या वडिलांनी दिलेल्या फिर्यादीवरून कारंजा ग्रामीण पोलिसांनी आरोपी तरुणाला बेड्या ठोकल्या आहेत. या घटनेमुळे परिसरात तीव्र संताप व्यक्त केला जात असून, आरोपीवर कठोर कारवाई करण्याची मागणी होत आहे.

advertisement

 नेमकं प्रकरण काय? 

मिळालेल्या माहितीनुसार, शेजारील गावातील 19 वर्षीय तरुण 28 मार्चच्या रात्री पीडित मुलीला भेटण्यासाठी खानापूर येथे आला होता. रात्री 11 वाजेच्या सुमारास मुलीचे वडील आणि भाऊ झोपेतून जागे झाले असता त्यांना मुलगी खोलीत दिसली नाही. संशय आल्याने त्यांनी घराच्या परिसरात शोध घेतला असता, घराच्या अंगणातच मुलगी आणि तो तरुण आक्षेपार्ह स्थितीत आढळून आले. वडिलांनी आरडाओरडा करताच तो तरुण तिथून अंधाराचा फायदा घेत पळून गेला.

फरार आरोपीला गावातून उचलले

पळून गेलेला तरुण ओळखीचा असल्याचे आणि तो केवळ भेटीसाठी आला होता. मात्र त्याने आपल्या इच्छेविरुद्ध बळजबरीने अत्याचार केल्याचे पीडित मुलीने आपल्या वडिलांना रडत सांगितले. या घटनेने हादरलेल्या वडिलांनी तात्काळ कारंजा ग्रामीण पोलीस ठाणे गाठले आणि आपबिती सांगितली. पोलिसांनी घटनेचे गांभीर्य ओळखून तातडीने पथके रवाना केली आणि आरोपीला त्याच्या गावातून उचलले.

आरोपीवर  पोक्सो अंतर्गत गुन्हा  दाखल 

कारंजा पोलिसांनी आरोपीविरुद्ध भारतीय न्याय संहिता आणि पोक्सो (POCSO) कायद्याच्या विविध कलमान्वये गुन्हा दाखल केला आहे. आरोपीला आज न्यायालयात हजर करण्यात येणार असून पोलीस कोठडीची मागणी केली जाणार आहे. ग्रामीण भागात अशा प्रकारे अल्पवयीन मुलींना जाळ्यात ओढून त्यांचे शोषण करणाऱ्या प्रवृत्तींविरुद्ध आता कडक पावले उचलण्याची गरज निर्माण झाली आहे. या प्रकरणी पोलीस तपास करत असून एवढ्या रात्री तरुणी मुलीच्या घरी का आला? याचा शोध घेत आहेत.

हे ही वाचा :

अमरावती सुन्न! दुचाकीवर जाणाऱ्या तरुणीला पाच जणांनी अडवलं, फरफट जंगलात नेऊन आळीपाळीने केले अत्याचार