मुस्ती येथील सुरेश वाकडे हे 59 वर्षांचे असून ते 1995 पासून गावातच बसवेश्वर या नावाने हॉटेल चालवतात. या लहानशा हॉटेलमध्ये त्यांनी बनवलेला पेढा खाण्यासाठी खवय्यांची गर्दी असते. दररोज 35 लिटर दूध उकळून केवळ सात किलो पेढा बनवला जातो. विशेष म्हणजे हा पेढा काही तासातच संपतो.
advertisement
कसा बनतो पेढा?
दररोज सकाळी म्हशीचे 35 ते 40 लिटर दूध आणून हा पेढा तयार केला जातो. दुधाला जवळपास तीन ते चार तास उकळून त्यामध्ये साखर घालून पेढा बनवला जातो. जवळपास 35 ते 40 लिटर दुधापासून 7 ते 8 किलो पेढा तयार होतो. एका पेढ्याची किंमत 20 रुपये इतकी आहे. तर 400 रुपये किलो दराने हा पेढा विक्री केला जातो. सुरेश वाकडे यांनी तयार केलेले पेढे सकाळी 11 ते 12 वाजण्याच्या आतच संपून जातात.
महिन्याला 40 हजारांचा नफा
गावातच पेढा बनवून त्याची विक्री केली जाते. त्याला मागणी देखील चांगली आहे. पेढे विक्रीतून सर्व खर्च वजा करून महिन्याला 30 ते 40 हजार रुपयापर्यंत नफा मिळतो. तर वर्षाला तीन लाख रुपयांचे उत्पन्न मिळते. या व्यवसायात दोघे कामगार देखील मदत करतात. त्याचंही कुटूंब याच व्यवसायवर चालतं, असं वाकडे सांगतात.
हॉटेलमध्ये खवय्यांची गर्दी
सुरेश वाकडे यांच्या बसवेश्वर हॉटेलमध्ये चहा, चुरमुरे पासून बनवलेला चिवडा, कांदा भजी, मिरची भजी देखील खाण्यासाठी उपलब्ध आहे. सुरेश यांचा पेढा खाण्यासाठी बोरामणी, कुंभारी, तांदूळवाडी, निलेगाव तसेच धाराशिव, तुळजापूर, लातूर, मुंबई पुणे येथून सुद्धा ग्राहक येत असतात. लोकांना खाण्यासाठी दर्जेदार क्वालिटी दिली तर लोक आपल्याला शोधून येतात, असं सुरेश सांगतात.