Property News: सरकारी कार्यालयांचे उंबरठे झिजवण्याची गरज नाही, मालमत्तेच्या 'फेरफार'सह ४५ कामं एका क्लिकवर, राज्य सरकारची घोषणा

मुंबई शहर आणि उर्वरित महाराष्ट्रातील प्रॉपर्टी कार्ड संधारणाची पद्धत वेगळी असल्याने, मुंबईत संगणकीकरणात काही तांत्रिक अडचणी येत होत्या. मात्र, जनतेची वाढती मागणी लक्षात घेऊन शासनाने यावर कायमस्वरूपी मार्ग काढला आहे. सध्या मुंबईतील १९ महसूल विभाग आणि ४ नगररचना योजनांमधील एकूण २७,८४७ संगणकीय मिळकतपत्रिका नागरिकांसाठी उपलब्ध करून देण्यात आल्या आहेत.

या नवीन प्रणालीसाठी विशेष सॉफ्टवेअर विकसित करण्यात आले आहे. नागरिक आता mahabhumi.gov.in या पोर्टलवर घरबसल्या फेरफारासाठी अर्ज करू शकतील. विशेष म्हणजे, अर्जाची सद्यस्थिती काय आहे, याची माहिती अर्जदाराला मोबाइलवर मेसेजद्वारे वेळोवेळी मिळणार आहे. या पारदर्शक प्रक्रियेमुळे भ्रष्टाचाराला आळा बसेल आणि कामात मोठी गती येईल, असा विश्वास महसूलमंत्र्यांनी व्यक्त केला.

मुंबईत प्रथमच तब्बल ४५ प्रकारच्या फेरफारांसाठी ऑनलाईन सुविधा देण्यात आली आहे. यात खरेदीखत, वारस नोंद, बक्षीसपत्र, भाडेपट्टा, गहाणखत, रोड सेटबँक, आरक्षण आणि भूसंपादन यांसारख्या महत्त्वाच्या कामांचा समावेश आहे. नागरिकांनी आता आपल्या मालमत्तेच्या कामांसाठी जिल्हाधिकारी कार्यालयात न जाता ऑनलाईन संकेतस्थळाचा वापर करावा, असे आवाहनही सरकारने केले आहे.