Weather Alert: राज्यात तुफान आलंया, रविवारी जोरदार पाऊस कोसळणार,19 जिल्ह्यांना अलर्ट

राज्यामध्ये मागील दोन दिवसांपासून पावसाचा जोर वाढल्याचं चित्र आहे. मराठवाडा, विदर्भ, दक्षिण कोकण आणि पश्चिम महाराष्ट्रातील काही जिल्ह्यांमध्ये जोरदार पाऊस झाल्याचे पाहायला मिळालं.

20 जुलै रोजी देखील राज्यातील बहुतांश भागांना जोरदार पावसाचा इशारा हवामान विभागाकडून देण्यात आला आहे. पाहुयात 20 जुलै रोजी राज्यामध्ये हवामानाची स्थिती कशी असेल.

मुंबई शहर आणि उपनगरामध्ये सामान्यतः ढगाळ आकाश राहणार असून अधून मधून हलक्या ते मध्यम पावसाची शक्यता आहे. ठाणे, रायगड, रत्नागिरी आणि सिंधुदुर्ग या जिल्ह्यांना हवामान विभागाने यलो अलर्ट दिला असून या जिल्ह्यांमध्ये तुरळ ठिकाणी मुसळधार पावसाचा इशारा भारतीय हवामानशास्त्र विभागाने दिला आहे.

पश्चिम महाराष्ट्रात पुणे, सातारा, आणि कोल्हापूरचा घाट परिसर त्याचबरोबर कोल्हापूर, सातारा, सांगली, सोलापूर या जिल्ह्यांना हवामान विभागाने यलो अलर्ट दिला आहे.

उत्तर महाराष्ट्रातील नाशिक, जळगाव, नंदुरबार, अहिल्यानगर, धुळे या जिल्ह्यांमध्ये तुरळ ठिकाणी विजांच्या कडकडाटासह हलका ते मध्यम पाऊस होण्याची शक्यता आहे.

तसेच मराठवाड्यातील संभाजीनगर, जालना परभणी, हिंगोली, नांदेड, लातूर, धाराशिव आणि बीड या जिल्ह्यांमध्ये ही तुरळ ठिकाणी विजांच्या कडकडाटासह हलका ते मध्यम पाऊस होण्याची शक्यता आहे.

विदर्भातील नागपूर, अमरावती बरोबर सर्व 11 जिल्ह्यांना हवामान विभागाने यलो अलर्ट दिला आहे. विदर्भातील सर्व जिल्ह्यांमध्ये विजांच्या कडकडाटासह जोरदार पावसाचा इशारा हवामान विभागाने दिलाय.