पुणे हादरलं! 1 रुपयाच्या वादातून कोयत्याने छाटला हात, रक्ताच्या थारोळ्यातून पोलिसांनी पिशवीत भरला पंजा अन्...

प्रकरण काय?

प्रसाद अंदुरे (वय २९, रा. प्रेमनगर, मार्केटयार्ड) असे गंभीर जखमी झालेल्या तरुणाचे नाव आहे. महर्षीनगर परिसरात दोन टपरी चालकांमध्ये मागील अनेक दिवसांपासून व्यवसायातील स्पर्धेतून वाद सुरू होते. सिलिंडरचे दर वाढलेले असतानाही, ग्राहकांना आकर्षित करण्यासाठी एक टपरी चालक दर कमी करत होता. तर दुसरा त्यापेक्षाही कमी दरात पदार्थ विकत होता. या दरांच्या स्पर्धेतून शुक्रवारी रात्री त्यांच्यात बाचाबाची झाली होती.

advertisement

शनिवारी दुपारी हा वाद विकोपाला गेला. एका टपरी चालकाने आपल्या साथीदारांसह प्रसाद अंदुरे आणि त्याच्या सहकाऱ्यावर कोयत्याने सपासप वार केले. हा हल्ला इतका भीषण होता की, प्रसादचा हाताचा पंजा छाटला गेला. घटनेची माहिती मिळताच स्वारगेट पोलिसांनी घटनास्थळी धाव घेतली. माणुसकी दाखवत पोलिसांनी तुटलेला पंजा एका प्लास्टिक पिशवीत भरून तातडीने ससून रुग्णालयात नेला. तिथे रात्री उशिरापर्यंत हा पंजा पुन्हा जोडण्यासाठी शस्त्रक्रिया सुरू होती.

वरिष्ठ पोलीस निरीक्षक यशवंत निकम यांच्या मार्गदर्शनाखाली या प्रकरणाचा तपास सुरू असून, पोलिसांनी हल्लेखोरांच्या मुसक्या आवळल्या आहेत.