पुणेकरांसाठी गुड न्यूज! 'सिंगल पिलर'वर उभा राहणार भव्य 8 पदरी पूल; पुणे-नाशिक प्रवासाचा कायापालट

प्रकल्पाची वैशिष्ट्ये

भारतीय राष्ट्रीय महामार्ग प्राधिकरणाद्वारे (NHAI) राबवण्यात येणारा हा प्रकल्प तांत्रिकदृष्ट्या अतिशय प्रगत असणार आहे. हा संपूर्ण ८ पदरी फ्लायओव्हर एकाच खांबावर म्हणजेच सिंगल पिलरवर उभा असेल, ज्यामुळे जमिनीवर कमीत कमी जागा व्यापली जाईल.

एलिव्हेटेड पुलासोबतच खालच्या विद्यमान महामार्गाचे ४ ते ६ पदरी रुंदीकरण केले जाणार आहे. एकूण ३० किलोमीटर लांबीच्या या प्रकल्पामुळे स्थानिक आणि लांब पल्ल्याची वाहतूक पूर्णपणे वेगळी होईल. तसंच भोसरी, मोशी, चाकण आणि खेड यांसारख्या प्रमुख औद्योगिक केंद्रांशी वेगवान आणि सुरक्षित संपर्क शक्य होईल.

advertisement

कामगार आणि उद्योजकांना मोठा दिलासा

आमदार महेश लांडगे यांनी या प्रकल्पासाठी सातत्याने केंद्र आणि राज्य सरकारकडे पाठपुरावा केला होता. भोसरी ते मोशी दरम्यानच्या भू-संपादनातील अडचणी दूर करण्यासाठी आता युद्धपातळीवर प्रयत्न सुरू आहेत. हा कॉरिडॉर पूर्ण झाल्यावर चाकण एमआयडीसीमध्ये जाणाऱ्या लाखो कामगारांचा तासनतास होणारा खोळंबा थांबणार आहे. "नितीन गडकरींच्या नेतृत्वात हा प्रकल्प पिंपरी-चिंचवड आणि चाकण परिसराच्या विकासासाठी मैलाचा दगड ठरेल," असा विश्वास आमदार लांडगे यांनी व्यक्त केला आहे.