पुण्यातील नामांकित कॉलेजजवळ देहविक्री रॅकेट, लॉजवर सुरू होता धक्कादायक प्रकार, 4 तरुणींची सुटका

मिळालेल्या माहितीनुसार, पुणे पोलिसांनी शहरातील अनैतिक मानवी वाहतूक आणि वेश्याव्यवसायाविरोधात मोठी कारवाई केली आहे. गुन्हे शाखेच्या पथकाने नऱ्हेगाव परिसरातील एका लॉजवर छापा टाकला. या छापेमारीत पोलिसांनी 4 तरुणींची सुटका केली असून 3 पुरुष आरोपींना अटक केली आहे.

पोलिसांनी दिलेल्या माहितीनुसार, अनैतिक मानवी वाहतूक आणि व्यापार प्रतिबंध कक्षाला गुप्त माहिती मिळाली होती की नऱ्हेगाव येथील झील कॉलेजवळील “स्वर्ग एक्झिक्युटिव्ह पॅराडाईज लॉज” येथे महिलांकडून वेश्याव्यवसाय करून घेतला जात आहे. या माहितीची खात्री करून पोलिसांनी बनावट ग्राहकाच्या मदतीने सापळा रचला. यानंतर पोलिसांनी संबंधित लॉजवर अचानक छापा टाकत कारवाई केली. या कारवाईत वेश्याव्यवसायासाठी आणलेल्या ४ पीडित महिलांची सुटका करण्यात आली.

advertisement

या प्रकरणी पोलिसांनी अभिषेक दिलीप गवळी (वय २४, रा. खेड शिवापूर), रामू सांडू देवकर (वय २४, रा. सिंहगड रोड, पुणे) आणि महेश गणेश नागने (वय ३४, रा. न-हे गाव, पुणे) या तिघांना अटक केली आहे. या तिघांवर अनैतिक मानवी वाहतूक (प्रतिबंध) अधिनियम १९५६ अंतर्गत गुन्हा दाखल करण्यात आला आहे. संबंधित गुन्हा नऱ्हे पोलीस ठाण्यात नोंद करण्यात आला असून पुढील तपास सुरू आहे.