TRENDING:
कोण आहेत उपमहापौर परशुराम वाडेकर?
परशुराम वाडेकर हे रिपब्लिकन पार्टी ऑफ इंडियाचे (आठवले गट) निष्ठावंत नेते आहेत. विशेष म्हणजे, महायुतीच्या जागावाटपात त्यांनी भाजपच्या चिन्हावर निवडणूक लढवली होती. वाडेकर यांच्या निवडीने एक दुर्मिळ योगायोग जुळून आला आहे. गेल्या टर्ममध्ये त्यांच्या पत्नी सुनिता वाडेकर यांनी पुण्याचे उपमहापौरपद भूषवले होते. आता त्यांच्याच पावलावर पाऊल ठेवत परशुराम वाडेकर हेदेखील या महत्त्वाच्या पदावर विराजमान झाले आहेत. एकाच कुटुंबात पत्नीपाठोपाठ पतीला हे मानाचे पद मिळण्याची ही शहरातील पहिलीच घटना असावी.
advertisement
महापौरपदी मंजुषा नागपुरे यांची बिनविरोध निवड
महापौरपद 'सर्वसाधारण महिला' प्रवर्गासाठी आरक्षित असल्याने वर्षा तापकीर, रंजना टिळेकर यांसारख्या ज्येष्ठ नावांची चर्चा होती. मात्र, पक्षाने उच्चशिक्षित आणि कार्यक्षम चेहरा म्हणून मंजुषा नागपुरे यांना संधी दिली. राष्ट्रवादीच्या शितल सावंत आणि काँग्रेसच्या अश्विनी लांडगे यांनी माघार घेतल्याने नागपुरे यांची निवड बिनविरोध झाली.
विरोधकांची माघार आणि भाजपची एकहाती सत्ता
पुणे महापालिकेत ११९ जागांसह भाजपला निर्विवाद बहुमत मिळाले आहे. यामुळे सत्ताधाऱ्यांचे पारडे आधीच जड होते. राष्ट्रवादीचे दत्तात्रय बहिरट आणि काँग्रेसचे साहिल केदारी यांनी उपमहापौर पदाच्या शर्यतीतून माघार घेतल्याने परशुराम वाडेकर यांचा मार्ग मोकळा झाला. भाजपच्या वरिष्ठ नेतृत्वाने मित्रपक्षाला (RPI) दिलेला हा शब्द पाळल्याचे या निवडीतून स्पष्ट होत आहे.