शेतकऱ्याची लेक झाली 'एमडी' डॉक्टर! करमाळ्याच्या डॉ. गौरी झोळ यांची वैद्यकीय क्षेत्रात उत्तुंग झेप; संघर्षाची प्रेरणादायी कहाणी

डॉ. गौरी यांचा प्रवास सोपा नव्हता. मातीशी नातं जपणाऱ्या झोळ कुटुंबात कष्ट, शिस्त आणि संयमाचे बाळकडू त्यांना लहानपणापासूनच मिळाले. बारामतीमधील शारदानगर येथे शालेय शिक्षण आणि त्यानंतर पुणे व मुंबईत वैद्यकीय शिक्षण पूर्ण करताना त्यांनी कधीही आपल्या मुळांना विसरू दिले नाही. वैद्यकीय शिक्षणातील प्रचंड स्पर्धा आणि अभ्यासाचा ताण यावर मात करत त्यांनी मिळवलेले हे यश म्हणजे ग्रामीण भागातील जिद्दीचे प्रतीक आहे.

या यशाचे खरे शिल्पकार ठरले ते म्हणजे अनुरथ झोळ आणि लक्ष्मी झोळ. स्वतःच्या गरजांना मुरड घालून, शेतात घाम गाळून या दाम्पत्याने आपल्या मुलींच्या स्वप्नांना बळ दिले. गौरी सांगते, "हे यश माझे एकटीचे नाही, तर माझ्या आई-वडिलांच्या कष्टाचे फळ आहे. वडिलांनी माझ्या पंखांना बळ दिले, तर आईने प्रत्येक संकटात माझा धीर वाढवला. त्यांच्या डोळ्यांतील समाधान, हेच माझे खरे यश आहे."

करमाळा तालुक्यासह संपूर्ण सोलापूर जिल्ह्यातून डॉ. गौरी झोळ यांच्यावर अभिनंदनाचा वर्षाव होत आहे. त्यांची लहान बहीण मानसी झोळ हिने देखील 'बीबीए इंटरनॅशनल बिझनेस'चे शिक्षण पूर्ण केले असून, झोळ कुटुंबाने आपल्या दोन्ही लेकींना उच्चशिक्षित करून समाजासमोर एक आदर्श ठेवला आहे.