3 वेगळे भाग, 3 फ्लॅट अन् 3 चोऱ्या; पण सगळीकडे चूक एकसारखीच! पुण्यात नेमकं काय घडलं ?

भरदिवसा कुलूपबंद घरांवर 'नजर'

चोरट्यांनी मुख्यत्वे अशा घरांना लक्ष्य केले जेथे भरदिवसा कुलूप होते. गोकुळनगर, काकडे वस्ती आणि मुंढवा या तीनही ठिकाणी घराचे कुलूप तोडून कपाटातील ऐवजावर हात साफ करण्यात आला. त्यामुळे आता घराला कुलूप लावून बाहेर पडताना पुणेकरांनी घरातील मौल्यवान साहित्य सुरक्षित ठिकाणी ठेवणं अतिशय गरेजचं आहे.

गोकुळनगर (कात्रज-कोंढवा रस्ता) येथील एका सोसायटीत चोरट्यांनी २ फेब्रुवारी रोजी भरदिवसा डल्ला मारला. कपाटातील साडेचार लाखांची रोकड आणि दागिने असा एकूण २४ लाख ४८ हजार रुपयांचा मुद्देमाल लंपास केला. येवलेवाडी पोलीस या प्रकरणाचा तपास करत आहेत. मुंढवा (श्री गजानन महाराज सोसायटी) येथेही चोरट्यांनी तोच कित्ता गिरवला. कपाटातील २ लाख १५ हजारांची रोकड आणि दागिने असा एकूण २२ लाख ११ हजार रुपयांचा ऐवज चोरीला गेला. कोंढव्यातील काकडे वस्ती येथे शनिवारी (दि. ७) भरदिवसा एका फ्लॅटचे कुलूप तोडून ८७ हजार रुपयांचा माल चोरट्यांनी लांबवला.

advertisement

पुणेकरांची 'ती' एक चूक कोणती?

या सर्व चोऱ्यांमध्ये एक गोष्ट प्रकर्षाने जाणवली, ती म्हणजे घराचे केवळ साधे कुलूप. चोरट्यांनी 'रेकी' करून ही घरं हेरली होती. भरदिवसा लोक कामावर गेल्याची खात्री पटताच, कपाटात मोठ्या प्रमाणात रोकड आणि दागिने ठेवल्याचा अंदाज चोरट्यांना लागला. मौल्यवान वस्तू बँकेच्या लॉकरमध्ये न ठेवता घरातच ठेवण्याची चूक घरमालकांना महागात पडली आहे.

सहाय्यक पोलीस निरीक्षक राकेश जाधव आणि सचिन थोरात या प्रकरणांचा सखोल तपास करत असून सीसीटीव्ही फुटेजची मदत घेतली जात आहे.