TRENDING:
फुरसुंगीत सोन्या-चांदीचे दुकान
तुझ्यासोबत लग्न करेन, असं म्हणत लग्नाचं आमिष दाखवून आणि आजारपणाचे खोटं नाटक रचून तरुणीने फसवणूक केल्यानं, प्रतीक राजेंद्र मेमाणे या तरुणाने आपल्याच दुकानात गळफास घेऊन आत्महत्या केली. या घटनेमुळे परिसरात मोठी खळबळ उडाली असून फुरसुंगी पोलिसांनी संबंधित तरुणीविरुद्ध गुन्हा दाखल केला आहे. प्रतीक मेमाणे यांचे फुरसुंगी सोन्या-चांदीचे दुकान आहे.
advertisement
प्रेमापोटी सोन्याची अंगठी दिली
काही महिन्यांपूर्वी सोशल मीडियाच्या माध्यमातून त्यांची ओळख भोर येथील श्रेया दादासो खोपडे-देशमुख हिच्याशी झाली होती. या ओळखीचे रूपांतर लवकरच प्रेमात झालं आणि श्रेयाने प्रतीकला लग्नाचे आमिष दाखवलं. प्रतीकने प्रेमापोटी तिला 50 हजार रुपयांची सोन्याची अंगठी आणि इतर महागड्या वस्तू भेट म्हणून दिल्या होत्या.
कॅन्सर झाल्याचं सांगून प्रतिकला धोका दिला
पोलिसात दिलेल्या फिर्यादीनुसार, श्रेयाने आपल्याला कॅन्सर झाल्याचे खोटे सांगून प्रतीकची दिशाभूल केली होती. गंभीर आजार असल्याचे ऐकूनही प्रतीक तिच्याशी लग्न करण्यास तयार होता. मात्र, काही काळानंतर श्रेयाने लग्नासाठी टाळाटाळ करण्यास सुरुवात केली आणि वारंवार भेटणे टाळले. प्रेमात झालेली ही फसवणूक आणि मानसिक छळ प्रतीक सहन करू शकला नाही. प्रतिकने आपल्या अखेरच्या चिठ्ठीत तरुणीला फाशीची शिक्षा व्हावी, अशी मागणी केली आहे.
तिला फाशी द्या, अशी माझी इच्छा
दरम्यान, प्रतीकने आत्महत्या करण्यापूर्वी सुसाईड नोट लिहून तरुणीवर गंभीर आरोप केले आहेत. तिने फसवणूक केल्यानंतर लग्नाची भीती वाटू लागली आहे. "माझी लग्न करण्याची इच्छा संपली आहे. आई-वडिलांसाठी जगायचे ठरवले होते, पण मनातून ही गोष्ट जात नाही. यातून बाहेर पडता येत नाही. मला ती आवडली होती; मात्र तिने धोका दिला आहे. आई, वडील, ताई मला माफ करा. तिला फाशी द्या, अशी माझी इच्छा आहे; नाही तर माझा आत्मा तिला सोडणार नाही", असं म्हणत प्रतिकने आपली जीवनयात्रा संपवली आहे.